Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
103-Trésor 7
[g1v]
Frère Dieudonné de Gouzon maistre
vii. Des biens des commandeurs(a) trespassés qui appartiennent à l’estat des commanderies
La saige administration requiert que l’estat des commanderies soit amplié et par bonne diligence gardé affin que ne soit par négligence destruit et le droit des successeurs aulcunement violé. Pourtant nous establissons que toutes les bestes, comme jumentz, beufz et aultres de quelque espece que soyent, que se trouveront es despouilles des trespassés commandeurs oultre l’estat des commanderies pour la moicté soit député à l’estat dicelles commanderies et l’autre moicté parviengne au trésor ; en après les utensilles adce nécessaires soyent députez à l’usaige des maisons des commanderies, c’est assavoir couvertes, matalaz, coytés et aultres utensilles pour la chambre, pour le palaix, pour le celier et la cuisine desquelz le commandeur usoit en sa vie ; pareillement doye demorer à us desdites commanderies les cars et charrettes et telles manières de choses ; et se les recepveurs seront négligens adce faire ou contredisans que adonque à leurs propres despens soient tenuz refaire ledit estat comme contient l’establissement, ausquelz le trésor ne soit tenu aulcune chose restituer ; et le prieur et chastellain d’Emposte à instance du commandeur dommagé doye contraindre le recepveur à refaire lesdites choses, et se(a) le prieur ou chastellain d’Emposte sera négligent que adoncques soit obligié de le refaire et restituer ; et que le maistre et couvent de Rhodes à instance du commandeur doyent contraindre le prieur et chastellain d’Emposte ad ce faire.
(b) Missing.