Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
081-Hospitalité 6
[f3v]
Frere Jehan de Lastic maistre
vi. Que les freres malades se doivent confesser et faire depropriement ; et que l’enfermier aye serviteurs propices
Ceulx qui sont malades premierement sont obligez sercher la medicine de l’âme que le remede du corps, car nous devons premierement adroisser nostre pensée à Dieu, souverain medicin et moderateur de toutes choses, du quel tous biens spirituelz et temporelz sont derivez et descendent, car pour les pechiez souventesfoys viennent les maladies. Pourtant meuz de bonne raison desirans pourveoir au salut de l’âme, repos du corps et conservation des biens nous establissons que tous les freres malades qui viennent ou sont portés à l’enfermerie de Rhodes pour recouvrer santé à l’entrée leur en ladite enfermerie devant le terme de xxiiii heures passé soient tenuz de se confesser et recevoir le sacrement de l’aultel. Et ce fait, face despropriement signé de la bulle du prieur auquel soit adjousté plaine foy. Et se aulcun recusera ce faire soit bouté hors par l’enfermier passé ledit terme. Et les choses necessaires [f4r] ne luy soyent administrées. En oultre affin que soit diligamment entendu au service des malades nous commandons que l’enfermier doye tenir au service d’icelle enfermerie serviteurs diligens et de bonne renommée et deux femmes honnestes sans aulcune suspicion ; et que tous les dessusdictz(a) soient cristiens.
Next Hospitalité 7 | Back to the Contents