Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
080-Hospitalité 5
[f3r]
Frere Jehan de Lastic maistre
v. Que ung chappellain soit deputé par l’ospitalier en compaignie du prieur de l’enfermerie neufve
Nous sommes tenuz et obligés de honnorer hospitalité en laquelle consiste le fondement de nostre religion. Et pourtant nous voulons que l’ospitalier commecte et depute aulcun chappellain de nostre ordre de vie honeste en compaignie du prieur de l’enfermerie neufve. Lequel ledit hospitalier presentera au prieur de l’esglise qui adce le confermera. Ledit chappellain deputé quatre messes en la [f3v] sepmaine – et le prieur d’icelle enfermerie trois messes – celebrera et dira affin que les malades chascun jour oyent la messe en la quelle prient Dieu que leur donne medicine de l’âme et du corps. Et ledit prieur d’icelle enfermerie aye ung clerc ydoine pour servir les dessusdites. Prieur, chappellain et clerc en compensation de leur excercice et labeurs doyent tenir les huit magasins d’icelle enfermerie neufve qui regardent la Porte-de-la-Marine. Et perpetuellement joyssent des rentes desdites magasins desquelles soyent payez huit florins de Rhodes audit clerc pour son salaire annuel. Et le residu desdites rentes le prieur et le chappellain par esgalle porcion partiront ; et seront contens dudit salaire sans ce que puissent aultre chose demander ; soient tenuz aussi avec toute diligence celebrer les messes, oyr les confessions, ministrer le sacrement de l’aultel, visiter les malades, ensevelir les mors et faire toutes choses qui sont necessaires au salut des âmes des malades.
Next Hospitalité 6 | Back to the Contents