Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
064-Eglise 31
[e7r]
Frere Jacques de Milly maistre
xxxi. Des preudommes de l’eglise
Il convient que les personnes religieuses soient circumspectes, sollicités et curieuses à observances de l’honneur divin affin que par negligence d’aulcun ne soient laissez ou variez les ordonnances de noz anciens instituteez à reverence de Dieu. Et pourtant nous establissons que par le maistre et conseil ordinaire soient esleuz et deputez de toutes langues, mais diverses, deux religieux, de vie approuvée et experimentée discretion, preudommes de l’eglise. Lesquelz en compaignie du prieur de l’eglise ou d’aulcun chappellain ydoine et de(a) sufficience prouvée, lequel ad ce doye deputer le prieur, avec grant dligence, cure et sollicitude doyent veoir et enquerir se en l’eglise de Saint Jehan chappelles et oratoires sont faictes et complies les choses qui appartiennent au service divin selon les institutions de noz anciens, tant spirituelles comme corporelles, concernans lesdictez eglises et chappelles. Et que doyent corriger et reparer les deffaulx, aussi facent et ayent inventoire et registre de toutes les institutions et fondations des [e7v] chappelles, lieux et possessions d’icelles et tous ornemens et biens meubles et immeubels, lequel inventoire et livre finy que sera le terme de l’office le presenteront aux maistre et conseil ordinaire affin que soit consigné aux preudommes successeurs. Et de tout ce que trouveront en l’exercice de leur office feront relation es assemblées des Quatre-Temps qui s’accoustument de faire chascun an. Et tous les defaulx diront au maistre et conseil ordinaire affin que soit pourveu selon l’exigence des choses. Et le terme d’un an lesditz freres exerceront ledit office, ou plus se semblera estre expediant au maistre et conseil. Et affin que lesditz preudommes puissent myeulx vacquer audit office est declaré que sont retenuz en main de maistre et exemps de gardes.