Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
065-Eglise 32
[e7v]
Frere Jacques de Milly maistre
xxxii. Que soit celebrée feste demy(a)-double de la saincte couronne de Jhesucrist
Il est chose decente reverir les sainctes reliques qui monstrent continuelle rememorance de saincte passion de Jhesucrist, mediateur de Dieu et des hommes, nostre saulveur et redempteur. Pourtant nous establissons que feste demy-double chascun an soit celebrée le huitiesme jour d’aoust en reverance de la saincte couronne d’espine de laquelle nostre saulveur Jhesucrist a esté en sa passion, laquelle pour nous a souffert, doloreusement affligy et d’icelle tenons une espine qui poindy le precieux chief de Crist dont sa face de son precieux sang fut perfusé. Laquelle espine est recluse es arches et secretz lieux de l’oratoire magistral en Rhodes, que chascun an le vendredy saint auquel est remembrée la passion au point du jour commence à florir, et à sexte en laquelle nostre saulveur expira se voit defflorie, et de puis peu à peu seche, et est memoire à tout feal cristien de la saincte passion de Jhesucrist.