Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
036-Eglise 3
[e1v]
Usaige
iii. Quelz jours les frères de l’ospital sont tenuz jeûner
Il appertient aux religieux honnorer et adorer Dieu de corps et de pensée et faire sainctes œuvres par lesquelles la char soit macerée et affligée. Et pourtant louvablement est instituy que les frères de nostre religion doivent faire et garder les jeûnes cy après declareez. Premièrement la jeûne de Quaresme, de Pasques, de la Résurrection : du mercredi de la Quinquagesime jusques au jour de Pasques. Après la solennité de la Grant Letanie qui se faict en la feste de saint Marc [d1r] l’Euvangeliste : iceluy jour mesmes, mais si la feste cherra en l’octave de Pasques ledit jour se transferist après l’octave. En oultre les Jours des Rogations qui se font devant la feste de l’Ascension nostre seigneur Jhesucrist, c’est assavoir lundi, mardi, mercredi. Item la vigille de Penthecouste. Et en icelle mesme sepmaine les jeûnes des Quatre-Temps. Et aussi les vigilles de saint Jehan Baptiste et des saincts apostres Pierre et Paul, saint Jacques apostre, saint Laurens martyr, l’Assumption Nostre Dame, saint Bartholomeu apostre, saint Mathieu apostre et en icelle sepmaine les jeûnes des Quatre- Temps – neantmoins se la feste dudit saint se célèbre le dimenche, adoncques lesditz jeûnes soient faictes en la sepmaine procédente, et se en autre jour se célèbre soient faiz en icelle sepmaine –, la vigille des saincts apostres Symon et Jude, la vigille de Tous-les-saintz, la quelle est le dernier jour d’octobre et la célébration diceulx le premier jour de novembre, la vigille saint André et les jeûnes des Quatre-Temps qui cheoient le mercredi après de la feste saincte Luce, item la vigille de saint Thomas apostre, la vigille de la Nativité Nostre Seigneur. La quelle coustume et ordonnance voulons et commandons estre tenue.