Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
037-Eglise 4
[e2r]
Usaige
iv.(a) Les festes qui(b) doibvent garder les frères de l’ospital
Il convient par dévote pensée tenir, observer et célébrer les festes des sainctes affin que par leurs prières nostre ordre soit conservée et amplieé et par icelles éternelle vie puissons acquerir. Et pourtant est institué que les frères de nostre ordre gardent les festes qui s’ensuyvent : premièrement la feste de Noël de nostre saulveur Jhesucrist, la feste de saint Etienne prothomartyr, la feste de saint Jehan evangeliste, semblablement des saincts Innocens et aussi les festes de la Circoncision, Épiphanie, Purification Nostre Dame et Annunciation dicelle ; item la Pasque de Nostre Seigneur avec le lundi et mardi ensuyvant ; item les festes de saint George martyr, de saint Philipe et saint Jacques [e2v] et les deux festes de saincte Croix ; item la feste de l’Ascension nostre seigneur Jhesucrist ; item la feste de la Penthecouste avec le lundi et mardi ensuyvant , la feste du Corps Crist, de la Nativité saint Jehan Baptiste , de saint Pierre et saint Pol apostres, de saincte Marie Magdalene, de sainct Jacques apostre, de saint Laurens martyr, de l’Assumption Nostre Dame, de saint Bartholomeu apostre, de la Nativité Nostre Dame, de saint Mathieu apostre, de saint Michel archangle, de saint Symon et Jude, de Tous les Saints premier jour de novembre, de saint Andry apostre, de saint Nicolas evesque, de la Conception Nostre Dame, de saincte Lucie vierge, de saint Thomas apostre.
(b) que.