Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
034-Eglise 1
[d8v]
Seconde partie
De l’église
Usaige
i. De la célébration des divins offices et de la vénération des sainctes reliques
Il n’est à homme Christien chose plus heureuse, joyeuse et doulce que de toute pensée et affection adorer Dieu, la foy catholique, et honnorer saincte église, et avecques diligence faire et complir les choses qui concernent l’onneur divin et l’ornement de l’eglise. Lesquelles choses – se sont condécentes aux personnes séculieres qui sont empeschez des affaires mondains pour quoy souventesfoys sont retraitz du service divin – moult plus ce appartient et est prouffitable aux personnes religieuses lesquelles ad ce faire non seulement le saint sacrement de baptesme, mais profession de religion les contrainct et induit. Et pourtant méritement les fondateurs et érecteurs de nostre religion et nos prédécesseurs adherans à leurs vertueux faiz avecques dévote pensée applicquée au service divin selon les louables anciennes coustumes diligemment et avec tout ornement ont rentée saincte église, institué solennitez, icelle garde comply et fondé oratoires qui par eulx ont este ornez de grans dons. La coustume desquelz et saincte observation dure jusques à présent, et icelle désirons par diligente pensée tenir, complir et executer. Et par ceste occasion approuvée et juste induitz confortons et admonnestons tous nos frères et leur enjoingnons à cause de la profession qu’ont faicte de la foy catholique et de religion que avec toute diligence doyent entendre au service divin affin que acompliez les solemnitez ecclesiastiques promptement puissent excercer les armes contre les ennemys de la croix. Ne aussi ne doibt on postposer la cure des sainctes reliques. Et pourtant debvons honnorer l’espine en mémoire de saincte Passion, prinse de la couronne d’espine, laquelle nostre saulveur Jhesucrist en son chief doloreusement toucha et par ferme renommée aigrement poigny. En remembrance de laquelle chose icelle espine chascun [e1r] an le jour du vendredi de la Passion de Jhesucrist florist et ce jour mesme seche, qui est reclusé ou saint oratoire du magistral palais en Rhodes. Oultre plus avec toute cure se doit honorer le denier d’argent, l’un des trente qui furent le pris de la personne de Jhesucrist par Judas trahy et apprecié, du quel en cere blanche se empriment ades figures(a) chascun an, quant se chante par le chappellain la Passion en l’esglise de Saint Jehan en Rhodes. Lesquelles figures sont propices à l’humain salut et l’enfanter des femmes et fortune de mer. Se doibt pareillement vénérer la saincte croix posée en la sacristie et faicte de la ligne de la Vraye Croix en la quelle pendist pour noz pechez nostre saulveur Jhesucrist. Et aussi la croix d’arain par ordonnance de saincte Helene, mère de Constantin le Grant, forgée et faicte du bassin au quel Jhesucrist lava les piedz des saintz apostres, la quelle croix de diverses langueurs garist. Icelle saincte et dévote matrone dudit bassin fist forger trois croix desquelles nostre religion tient l’une. À la vénération dicelle chascun vendredi le peuple dévotement va. Aussi honnorer de nous la saincte main dextre de nostre patron saint Jehan Baptiste qui Jesucrist baptisa et le vray Saulveur Messias demonstra. La quelle puis aulcun temps par merveilleux traictiez de la tirannie du Grant Turcq est par nostre ordre recouvrée ainsi que l’istoire sur ce faicte amplement declaire. Et semblablement les aultres sainctes reliques reclusés es esglises de nostre ordre se doivent honnorer et avec diligence garder affin que par intercession des sainctz lesquelz en icelles vénérons ayons de Dieu en toutes noz œuvres aide et félicité.