Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
033-Reception 23
[d7v]
Usaige
xxiii. Comment se restitue l’abit à ceulx qui diceluy sont privez
Nostre religion aulcunesfois a acoustumé user de miséricorde envers les deffaillans quant diceulx appert pénitence, et émendation des meurs, et bonté de vie est espérée, et que toute contumace rejectée humblement pardonnance est demandée, et aussi que pource on a espérance que naistra fruict de bonne odeur. Quant pardon selon la forme des establissemens est donnez aux privez de l’abit pour leur desmérites, et après l’habit est restituté et retourné à la compaignie des frères la forme de la restitution est telle :
Par commandement du maistre ou de son lieutenant, à son de campane, la publicque assemblée est célébrée. Et la seans les maistres, bailifz, prieurs, commandeurs et frères en la manière acoustumé par le commandement du maistre ou de son lieutenant le maistre escuyer conduit celuy qui a este privé de l’habit, vestu du vestement de séculier ou en chemise avecques la corde au col selon l’atrocité du crime commis, tenant [d8r] ung cierge ardant en ses mains en signe que prestement recouvrera charité et dilection de l’ordre, et ainsi humblement s’agenoille devant le maistre ou son lieutenant, demande, requiert et supplie, demonstrant de meurs et de vie émendation et honnesteté, pardon luy estre donné et l’abit restitué et aggregué à la compaignie des frères. Et le maistre après dit ce qui s’ensuit : « Jasoit manifest que pour tes desmerites justement tu as este privé de l’abit, toutesfois pource que avons espérance doresenavant seras de bonnes meurs et louable vie te pardonnons et restituons l’abit de nostre ordre. Et te recepvons à la compaignie de noz frères. Et pourtant faiz par manière que vertueusement, ritement et bien tu vives affin – ce que Dieu ne vueille – tu ne donnes occasion de executer contre toy sévérité et rigueur de justice. Tu reçoys grant grâce à peu octroyée, laquelle prions te prouffiter au salut et repos du corps et de l’âme ». Et ce dit, par commandement du maistre, le maistre escuyer prend le manteau et le mect sur les espaulles lyant le laz et cordon disant : « Prendz de rechief la servitude de Nostre Seigneur legiere et suave, laquelle donne salut à ton âme ». Ce fait le frère qui celle grâce a receu louant Dieu se reduict au service de l’ordre.