Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
031-Reception 21
[d5v]
Usaige
xxi. Comment les personnes séculieres doibvent estre receuz en confrères
Le bien tant qu’est plus communiqué est meilleur et plus prouffitable. Pour laquelle occasion noz prédecesseurs ont acoustumé faire participes de bonnes œuvres de nostre religion séculieres personnes soubz tiltre de confrarie. Et s’est acoustumé de recepvoir confrères soubz ceste forme :
Celuy qui désire estre receu en confrère de nostre religion doit reveramment comparoir devant le frère recepvant et à genoulx mettra la main sur le messel que le recepvant tient et promete en ceste forme de parole : « Je N. promectz à Dieu tout puissant, à la benoiste Vierge Marie, mère de Dieu, et à saint Jehan Baptiste, et au maistre, et à la Religion de Jherusalem que j’auray charité et amour selon la possibilité envers ledit maistre, frères et religion ; et de tout mon effort défenderay leurs personnes et biens ; et non le pouant faire leur manifesteray ; et toutes choses que leur seront nuysibles leur révèleray ; et ne feray jamais profession d’autre religion sinon dudit ordre de Jherusalem ; et se en [d6r] icelluy ne entreray je demande après ma mort estre ensevely ou cymetiere de l’ospital ; et donneray chascun an en la feste de saint Jehan Baptiste audit ordre aulcune chose en recongnoissance de fraternité ». Et après le frère recepvant doibt dire : « Pource que tu as promis lesditez choses nous toy et ton âme et de tes parens faisons participes de tous le biens faiz, oraisons, messes, divins offices et œuvres pies lesquelles perpétuellement se feront en nostre religion, desquelles nostre saulveur Jhesucrist vous face participe ». Et ce fait le frère recepvant ensemble les aultres frères assistans doyent baiser le confrère. Après soit enregistré ou livre de la confrarie et la notte ce que chascun an a promis donner. Ces choses commandons estre gardées en la réception des confrères, reservez les coustumes d’aulcuns prieurés(a) esquelz par avanture seroit autrement acoustumé, laquelle coustume entre eulx usitée en icelle réception doyent observer.
Next Reception 22 | Back to the Contents