Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
007-Reigle 3
[c6r] Coustume
iii. De l’exercice de la chevalerie pour Jhesucrist
Nostre religion du temps de sa première institution par l’aide et largesse du Saint-Siège apostolique et des princes catholiques et dévotes personnes Cristiennes a este dotée, augmentée, emplyée et enrychée de possessions, jurisdictions, grâces, privilèges et franchises affin que les chevaliers dicelle profes et enflamés de vraye charité, mère de vertu et estable fondement, doibvent adjoindre, acombler et copuler la chevalerie et défence de la foy à la saincte hospitalité ; et usant de double exercise deussent entendre à vertueuses gestes qui est chose vrayement propre au chevaliers de Crist : non postposant les sainctes œuvres de hospitalité combatre pour l’honneur de Crist, pour le service divin, pour la foy catholique et honnorer, reverir et déffendre la justice et sublever les oppressés. Ad ce certainement les hospitalliers chevaliers excercans l’ospitalité et chevalerie en leur vestement exterieur portent le signal de la croix à huict poinctes ornées par dévotes considérations des vertus affin aussi que en l’interieur vestement portent spirituellement le signal de la vraye croix ; et par la dextre vibrant l’espée poindant depuis la multiplication des aulmones doyent oppugner, oppresser et subjuguer la gent infidèle et ceulx qui defuoyent de la foy. Auquelles sainctes œuvres ordonnez sont esmeuz, incitez et embrasez ensuyr et inviter l’exemple des saincts martirs et chevaliers ales Machabées(a) combatans pour le nom de Dieu, lesquelsz aulcunes foys avecque peu de nombre sont accoustumés presser, vaincre et subjuger grans exercices des prophanes gens par l’aide de la divine puissance. Et pourtant les religieux chevaliers ayent en leurs pensées informez de l’amour de Dieu tenir, complir et parfaire les trois veux substantiaulx de la saincte reigle : obéissance, chasteté et pauvreté, c’est assavoir vivre sans propre, et se doibvent efforcer entendre aux vertus moralles et théologiennes. Pour [c6v] lesquelles prudamment, temperamment et avecques force enflammez de charité avecques l’espée non ayant paour d’entrer es périlz pour le nom de Jhesucrist nostre saulveur et pour le vray signal de la croix, pour la liberté de l’église, pour la justice, pour les pupilles et pour les vefves. Vraiement, aulcun ne peult avoir plus grant charité, qui mettre son âme, c’est assavoir sa vie, pour les amys, c’est pour les catholiques ! C’est leur propriété, c’est leur vocation, c’est leur élection, c’est leur institution et depuis c’est leur sanctification affin que fuye ceste vie pérégrine après endroissés de ferme espérance doyent fruyr(b) de la rétribution éternelle à laquelle l’humaine nature est de Dieu créé. Se aulcuns de ses sainctes œuvres es batailles laquelle se fait pour le nom de Jesucrist sera trouvé prévaricateur, détracteur, déserteur à telz non sans cause est proposée purgacion et censuré peine selon la forme des establissemens et coustumes de nostre dit ordre á terreur des pervers et louenge des bons.