Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
006-Reigle 2
ii. La dispensation des observances de la reigle, reservez les trois veulx substantiaulx qui demeurent en leur force
Il y a plusieurs choses en l’ancienne reigle, qui totalement sont abollyés et hors de coustume. Lesquelles vrayement selon la convennance du temps, condition des âges, qualité des lieux, considération des personnes au salut de l’âme se doibvent muer, corriger, declairer, relaxer et amodérer. Aultrement seroit plus tost lyer et obligier les dévotes âmes par obscurités et ambiguités se prudentement n’estoit pourveu à la qualité et condition des choses. Grande est la fragilité humaine et encliné au mal qui promptement chiet se n’estoit soubstenue par l’aide de Dieu et du Saint-Siège apostolicque. Entre les autres sainctes congrégacions et religions l’ordre de Jherusalem a souffert et souffre chascun jour de grans détrimens et périlz pourquoy pourvoyant ausditz incommoditez noz frères ne pevent garder les régulières disciplines et premières institutions de l’ospital et saincte maison de Jherusalem. Pour laquelle raison le Saint-Siège apostolique et noz tressaintz pères induictz par clémence, pourveant aut salut de noz frères avec eulx d’aulcunes choses contenues en la reigle de la première institution, reservez les trois veulx substantiaulx que sommes tenus garder, de spéciale grâce ont dispensé et dicelle absolu ; et aulcunes sont contenues es establissemens et autres totalement par coustumes sont abolys. Pourtant en ceste rénovation délaissant aulcunes réservacions avons seulement mys et inseri les trois veulx substantiaulx commandant à noz frères les doyent de tout dévot couraige garder.