Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
004 Primordium
[c3r] Première partie :
Du commencement de la religion.
i. Le fondement du saint hospital et de l’ordre de la chevalerie des hospitaliers de saint Jehan Baptiste de Jherusalem
Selon la verité et anciennes et sainctes hystoires l’ospital et saincte maison et religion de la chevalerie des hospitaliers de saint Jehan Baptiste de Jherusalem a prins ce commencement : Après que Alixandre le Grant, roy de Macedonne, eust concquesté les Indes et son trespas en Babilonne, acertannés de sa mort les vaillans et vertueulx chevaliers les Machabées, par leur vertu, boutèrent hors de Jherusalem les gentilz prophanes generations, et le peuple des Juifz, ententif au service divin, fut reduit en sa franchise. Depuis, contre ceulx de Jherusalem les voisins firent de grans guerres. Finablement quant le tresnoble chevalier et champion de la congnoissance divine et victorieulx triumpheur Judas Machabeus qui ung Dieu adoroit eust felicement livré de la tirannie des gentilz la saincte cité de Jherusalem, et de rechief appareillast armées contre les ennemis voisins paiens, ordonnées en la saincte cité les choses necessaires delibéra avec grant couraige assaillir les gentilz. En icelle bataille plusieurs du peuple d’Israel furent tuez, bleciez et faiz impotens. Quant fut retourné en Jherusalem, considerant qu’estoit chose saincte et devote prier pour les trespassés en la bataille, ordonna et institua que es sainctz lieux se fist prière continuelle pour ceux qui estoient occis en bataille et que aulx malades et impotens fust donné subvention.
Soubz ceste institution, passé aulcun temps, tresdevot Jehan Hircanus, prophète et genereulx chevalier du peuple d’Israel, institua ung hospital qu’on appelloit xenodoche du residu des deniers du trésor que avoit prins de la sepulture du roy David, desquelz avoit delivré la saincte cité de Jherusalem du siège que tenoit devant icelle le roy Anthiocus, nommé Epiphanes, persécuteur des Hebreux pour le nom de Dieu, qui destruit le Temple Salomon lequel après fut [c3v] redifié et restitué par les Machabées. Ou quel hospital, comme imitateur de Judas Machabeus, ordonna que feussent faictes continuelles prières et les impotens, et foibles pèlerins, et malades devotement fussent receux, recréés et nourriz.
Par succession de temps la édification et institution de ce saint hospital dura jusques à l’incarnation de nostre redempteur et saulveur Jhesucrist qui jasoit fut riche néantmoins pour nous se fist pauvre. Pourtant se doit devotement considerer que souventes fois ledist hospital par corporelle présence visita et plusieurs sainctes œuvres et miracles en icelluy par sa divine clémence demonstra, et que oudit lieu les saintz Apostres et disciples de Jhesucrist ont fait œuvres de miséricorde certainement aulcun ne doibt doubter veu que nostre saulveur Jhesucrist devant sa passion a magnifié et glorifié plusieurs prophanes lieux de Jherusalem par sainctes œuvres que aussi par sa clémence a illuminé et decoré icelluy hospital de Jherusalem, lieu saint, refuge des pauvres et malades.
Puis, après la saincte passion de nostre saulveur Jhesucrist, à occasion des pechiez et iniquités du peuple des Juifz, la saincte cité de Jherusalem a souffert grans désolations ou temps de Titus et Vaspasianus, empereurs de Romme très victorieuse, qui firent la vengance du precieux sang de nostre saulveur Jhesucrist, et par diverses coustumes de gentilz a este polue et maculée, et de diverses nacions subiuguée et destruicte, et par ces destructions le Temple de Salomon restauré par les Machabées et ledit hospital fondé par Jehan Hircanus ensemble les aultres sainctz lieux ont este desolez, ruynez et destruictz en manière que la religieuse observance de chevalerie et hospitalité par aulcun temps a este intermise et laissée. Et après premièrement restituy de rechef la cité et Temple de Jherusalem par Adrien Elyus, empereur des Rommains, et à ceste cause estant le royaulme de Jherusalem destitué et privé de toute bellesse et ornement ou quel régnèrent en ce temps diverses générations de payens, les Cristiens de tout le monde tant de occident comme [c4r] de orient et ailleurs en grant péril aloient en Jherusalem pour visiter le Saint-Sépulcre et devotz lieux. En la quelle cité les Cristiens latins subiectz à l’esglise Romaine n’avoient aulcun refuge ne habitation. Et pour ceste cause souffroient grant enormitez périlz, dommaiges, necessités et pauvretés de vivre, et subvention corporelle badtus, bleciés, calumpniez, injuriez et mal traictiez des infidelez et habitans dicelle saincte cité, en manière que plusieurs mouroient par les chemins et ruez comme bestes non sans vergoigne de la foy catholicque, car ny avoit homme qui les consolast par la cruaulté et inhumanité des habitans.
Meu adoncques pour ces causes et induit du Saint Esperit ung homme de saincte et vertueuse vie nommé Girard, tresdevot pèlerin craingnant Dieu et desirant le salut de son âme, qui peu de temps avant estoit venu pellerin en Jherusalem, voyant et considerant la submission, perilz et dommaiges des devotes personnes qui la venoient delibera faire et edifier ung nouveau hospital, refuge et habitation des malades, pèlerins, impotens et pauvres, à exemple du premier xenodoche, et renovant par imitation la saincte observation des tresvaillans chevaliers Judas Machabeus et Jehan Hircanus, tresnobles combateurs. Et de ce faire obtenu povoir du prince infidel qui adoncques tenoit la seigneurie en Jherusalem, ledit Girard, imitateur des vestiges et coustumes des dessudictes, fist et edifia ung nouvel hospital ou lieu par luy esleu près du Saint-Sépulchre de nostre saulveur Jhesucrist. Lequel hospital fust desdié a saint Jehan Baptiste comme à patron pource que son père faint Zacharias, prophète, quant venoit en Jherusalem pour faire sacrifice en icelluy lieu demouroit. Quant le saint hospital fust felicement edifié et de bonnes coustumes et oeuvres orné et institué, ledit Girard, zelateur de l’amour de la foy catholicque, se desdia et astraint au service dicelle et des pauvres et malades dudit hospital et induit ses compaignons qui avecques luy estoyent venuz pareillement ad ce faire et ainsi firent une sainte com-[c4v]paigne et fraternité ensemble – sans faire veu de religion ne muer l’abit séculier, mais seulement usans des humbles vestemens – se obligèrent au service de la saincte foy catholicque et des pauvres.
Ou quel vrayement toutes les œuvres de miséricorde furent diligemment compliez : les pauvres soustenuz et gouvernez, les malades curez et garis, les sainctz sacremens administrés, les pèlerins et desolez defendus des ennemys de la foy et receuz, consolez et enseignez, et prisonniers rachetez, et toute hospitalité en iceluy lieu est celebrée, faicte et honnorée. Pour lesquelles sainctes œuvres le saint hospital en brief temps fust augmenté et emply des possessions et seignouries. Et ainsi par diligence et cure de Girard la condition et estat de l’ospital ampliée et acreue le Saint-Siège apostolicque, à la supplication dudit Girard, print ledit xenodoche en sa protection et diceluy l’apellé fundateur, erecteur et prévost. Et défend nostre Saint Père Lucius papa secundus que aulcun ne présume violamment occuper le gouvernement et administration diceluy hospital, mais qui par ceulx qui estoient desdiez au service dicelluy saint ordre seroit esleu ung qui d’eust audit hospital presider.
Et chascun jour plusieurs devotz pèlerins, induitz de l’amour de la défense de la saincte foy catholicque, se misdrent et abstraindent au service et tuicion dicelle ensemble des pèlerins venans en Jherusalem et aussi des sainctz lieux prennent les armes contre les payens et ennemys de la foy et les défendent de leurs invaseurs. Et pourtant comme vrays imitateurs de tresnoble et tresdevot Judas Machabeus et Jehan Hircanus font l’exercite de la tuicion de la foy et hospitalité et pour l’amour de Dieu prendent les armes.
Quant ledit Girard par l’espace de seize ans avec grant louenge eust gouverné ledit hospital trespassa de ceste vie présente. Et puis, par élection des devotes personnes, ung nommé Raymond du Puys de grans merites et vertueulx fut esleu maistre à ladicte sain-[c5r]cte chevalerie et hospital. Lequel Raymond, comme saige et digne de louenge, promettant, ratifiant et approuvant nostre Saint Père le pape Eugenius tiers de ce nom ordona et institua la reigle et habit des chevaliers et hospitaliers, qui est la croix blanche à huit poinctes et manteau noir, à laquelle reigle plusieurs nobles ensemble clercs et lays soubz ledit habit avec jurement se abstaindrent.
Iceluy ordre de chevalerie et hospital fut emplye de renommée et richessés soubz le gouvernement dudit Raymond premier maistre – en especial après la réduction de la saincte cité de Jherusalem aux Cristiens, de laquelle emprise fut victorieur capitaine Godefroy de Buillon de Gaule Belgique –, aux vestiges duquel maistre plusieurs des successeurs et adhérens ont perpetrez grans et illustres faiz comme est amplement contenu es histoires des gestes de Rhodes lequelz à présent n’est necessaire icy raconter, car n’est point nostre pourpos de scripre histoires. Il doit suffire avoir demonstré le commencement et fondement dudit ordre, mais en quelle manière et en quel temps ladite chevalerie et hospiatalité et saincte observation vint en Rhodes et la succession des gestes les histoires Rhodiennes amplement le déclairent et démonstrent.