1510.01.18.

Frater Emericus etc. et nos baiulivi, priores, preceptores et fratres capitulum generale Rhodi celebrantes. Dilecto nobis in Christo papati Michaeli tu Proto Papa castelli nostri Lindi salutem etc.

Supplicationis tue series nobis porrecte in effectu continebat, quod avus tuus dicti castelli protus papas ex concessione predecessorum nostrorum ecclesiam Sancti Stephani dicti castelli ad vitam suam habebat, tenebat et possidebat, quam in manibus nostris iuspatronatus super dicta ecclesia habentibus nostra accedente licentia in favorem tuum renunciavit et tu ex permissione nostra eandem hactenus habuisti et tenuisti tuaque vita durante habere et possidere debes.

Tamen quum dicta ecclesia ob vetustatem ruinam minetur, cupis ex tuis propriis facultatibus ipsam instaurare et reparare, si tibi auctoritatem et facultatem concesserimus in papatem dicte ecclesie tuum successorem unum ex tuis filiis tibi benevisum eligendi et nominandi.

Quare nos proni ad ea, que honorem Dei concernunt et ad divinum cultum faciunt, te perpetuum papatem in dicta ecclesia vita tua durante confirmamus, et si dictas reparationes, quas in dicta ecclesia facere polliceris, compleveris et a ruina ipsam vindicaveris et divinus cultus debite in eadem celebrabitur, nos auctoritate et decreto nostri presentis generalis capituli habita relatione a nostro ven[eran]do senescallo super hoc ad se informandum et referendum deputato, serie presentium de nostra certa scientia damus tibi facultatem, auctoritatem, totaliterque vices nostras magisterii et iurispatronatus nostri ac nostras in vim cuius tu ad tuum beneplacitum unum ex dictis tuis filiis futurum dicte ecclesie papatem eligere, nominare et creare possis tuum successorem, qui secundum Grecorum probatum ritum divina in eadem celebret.

Mandantes et pre[scribentes] uni[versis] et sin[gulis] d[icte] do[mus] n[ostre] f[ratribus] q[uecunque] auc[toritate] di[gnitate] of[ficio]que fun[gent], p[resentibus] et futuris, ut presentes nostras litteras observent et ab alii observari faciant.