1493.08.05.a.

Partitio commendarum inter fratres milites, et cappellanos ac servientes prioratus Alemaniae.

[...] Series ordinis et particionis talis est. In nomine Domini amen. Anno incarnacionis eiusdem MCCCCLXXXXIII die vero quinta mensis Augusti reverendi domini domini fratres Petrus Stolz magnus baiulivus sacri conventus Rhodi et Karolus {fol. 96v} de Jesualdo prior Ungarie atque Johannes Reccrot preceptor de Honrem prioratus Alamanie cappellanus electi et depputati arbitri arbitratores et amicabiles compositores cum auctoritate et licencia reverendissimi domini cardinalis et magni magistri ac reverendi capituli generalis per honorandos dominos fratres milites ex una et capellanos servientesque parte ex altera venerande lingue Alamanie ad ordinandum, parciandum, dividandum ac depputandum in vim capituli generalis omnes et singulas preceptorias dicti prioratus tam Inferioris quam Superioris Alamanie determinarunt, deliberarunt, arbitrati sunt, concordarunt et ordinarunt unanimi consensu et voto pro quitte predictarum partium religionisque utilitate preceptorias ex quibus fratres milites dicte lingue habere provisionem possunt et debent titulo cabimenti, melioramenti seu aliter et etiam illas de quibus dicti fratres capellani et servientes provideri possunt et habere sub predictis titulis, intellectis tamen quod fuit salva iura thesauri imposita et imponenda et quod huiusmodi determinacio atque particio non fit in preiudicium preeminenciarum magistralium et venerandi prioris Alamanie, in conferendis preceptoriis de gratia sed de his possint libere uti non obstante huiusmodi particione que talis est.

Primo declararunt, ordinarunt et partiti sunt quod preceptorie que secuntur, intelliguntur et sunt depputate pro fratribus militibus dicti prioratus Alamanie tam Inferioris quam Superioris, videlicet Hoenreym, Basilia, Emendorff, Villingen, Magoncia, Heymbach, Torleschem, Sulcz, Ffriburg, Tobel, Rodorff, Rotwill, Uberlingen, Castrim, Adenaue, Treveris, Steymffurt, Dusperg, Walsheim, Loige, Rotemburg, Erlingen, Hall, Wibourg, Rudigheim cum membro Nida quod per huiusmodi particionem intelligitur esse unitum ipsi preceptorie, Mergetheim, Ffrancffurdia, Wycsella, Arnnheim, cum suis membris et pertinenciis consuetis. Preceptorie autem deputate fratribus {fol. 97r} capellanis et servientibus sequuntur: Columbaria, Ratispona, Schlussingen, Wysensehe, Wormasia, Prisich cum membro Mergenheim quod etiam per dictam particionem intelligitur esse unitum cum preceptoria^(a), Velden, Mecheln, Herforden, Burhem cum suis membris et pertinenciis consuetis, quamquam particionem, divisionem et deputacionem predicte partes tam milites quam capellani et servientes solemni iuramento prestito de licencia Reverendissimi domini cardinalis et magni magistri acceptarunt et gratam ratamque habuerunt promiseruntque nullo umquam tempore contrafacere, dicere seu contravenire clam vel palam sub pena periurii et inhabilitatis ad obtinendas preceptorias.

In cuius rei testimonium bulla nostra communis plumbea presentibus est appensa.

Datum Rhodi durante nostro generali capitulo die quinta mensis augusti anno ab incarnato Christo Ihesu domino nostro millesimo quadringentesimo nonagesimo tercio.