1472.06.12.

Sixtus episcopus servus servorum Dei dilecto filio preposito ecclesie sancti Johannis Traiectensis salutem et apostolicam benedictionem.

Votis illis nos decet prestare assensum per que loca religiosa quecunque feliciter et utiliter possint gubernari. Sane pro parte venerabilis fratris nostri Davidis episcopi Traiectensis ac dilectorum filiorum burgimag[ist]rorum et consulum civitatis Traiectensis nec non preceptoris domus sancte Catherine Traiectensis Hospitalis sancti Johannis Ierosolimitani nobis nuper exhibita petitio continebat quod licet dudum dilecti filii fratres et conventus eiusdem domus dilectum filium Engelbertum de Foreest fratrem domus et hospitalis predictorum ad preceptoriam ipsam tunc certo modo vacantem pro illius regimine magis ydoneum in ip[s]orum ac domus predicte preceptorem elegerint ac ipsa eorum electio tanquam canonice celebrata per priorem Alamanie secundum morem dicti hospitalis confirmata fuerit et illarum obtentu dictus Engelbertus domum prefatam annis triginta et ultra possederit prout possidet de presenti pacifice et quiete.

Nichilominus quia ab aliquibus asseritur quod dictus prior Alamanie pro tempore existens superioribus temporibus preceptorem domus prefate illius vacationis tempore occurrente pro nutu suo ponere consuevit, non habito respectu an domui ipsi pro illius {p. 2} regimine utilis foret cum in longinquis habitans mores patrie illius ignoret ac penitus sibi incognite existant, valde dubitandum est quod si hoc fieret "domus ipsa in qua hore canonice diurne et nocturne quotidie decantantur et hospitalitas magna ibidem servatur et quilibet infirmus quocumque morbo etiam peste epidimia gravatus ad eandem domum declinans benivolum sibi in eadem reperit receptorem", ad ruinam prout alias propter incuriam et malum regimen preceptorum pro tempore olim per dictum priorem Alamanie deputatorum sepenumero minata fuit et in ea hospitalitates neglecte et divinus cultus diminutus fuere, prohdolor deveniat. Quare pro parte episcopi, burgimag[ist]rorum, consulum, preceptoris et fratrum predictorum nobis fuit humiliter supplicatum ut indemnitati dicte domus super hoc oportune providere de benignitate apostolica dignaremur.

Nos itaque de premissis certam notitiam non habentes huiusmodi supplicationibus inclinati discretioni tue per apostolica scripta mandamus quatinus si vocatis quorum interest tibi de premissis legitime constiterit auctoritate nostra perpetuo statuas et ordines quod fratres et conventus domus predicte qui melius norunt quis domui ipsi pro illius regimine utilior sit de preceptore pro tempore utili et ydoneo eidem preceptorie providere valeant {p. 3} quotiens illius vacationem pro tempore occurrere contingeret servatis solemnitatibus in talibus consuetis unum ex fratribus dicte vel alterius domus hospitalis predicti quem ad hoc magis ydoneum noverint eligere possint, quem prior Alamanie pro tempore existens confirmare teneatur sicut predecessor immediatus moderni prioris Alamanie huiusmodi ultimam electionem per dictos fratres et conventum factam confirmavit. Non obstantibus premissis ac constitutionibus et ordinationibus apostolicis nec non statutis, stabilimentis et consuetudinibus hospitalis et domus predictorum iuramento, confirmatione apostolica vel quavis firmitate alia roboratis ceterisque contrariis^(a) quibuscunque.

Datum Rome apud sanctum Petrum anno incarnationis dominice millesimo quadringentesimo septuagesimo secundo, pridie Idus Iunii pontificatus nostri anno primo.