1454.12.22.

Frater Jacobus de Milly etc. religioso in Christo nobis carissimo fratri Rogerio Joede domus seu baiullie nostre de Mechelen prioratus nostri Almanie preceptori salutem in Domino et nostris firmiter obedire mandatis.

Ad aures nostras pervenit vos quendam religiosum nostri ordinis nominatum fratrem Hermannum Holt fecisse pastorem sive curatum in quadam parochia sive ecclesia nominata Willre dominationis dicte nostre preceptorie, quiquidem frater ut audimus est scandalosus rixas movens et inhoneste vivens in obprobrium nostre religionis et dicte ecclesie et eciam vestri preceptoris.

Quocircha ex nostra certa sciencia volentes providere honestati nostrorum religiosorum vobis committimus et si opus est in virtute sancte obediencie precipiendo mandamus quatenus sine aliqua dilacione dictum fratrem Hermannum removeatis a cura sive parochia et regimine dicte ecclesie, et sibi iubeatis et eum cogatis ad redeundum et revertendum ad suum conventum sive stagiam ubi primitus morabatur; et casu quo dictus frater Hermannus nollet exire dictam ecclesiam et obedire mandatis vestris, vobis auctoritatem et facultatem damus eum capiendi, detinendi, incarcerandi et puniendi tamquam inobedientem et rebellem secundum formam stabilimentorum nostrorum bonorumque morum et consuetudinum nostre religionis. Taliter ergo in premissis vos exhibeatis ut de vera valeatis aput nos obediencia comendari.

In cuius rei testimonium bulla nostra magistralis in cera nigra presentibus est impressa.

Datum Rhodi in nostro conventu die XXII Decembris anno MCCCCLIIII.

^(a)Non obstante quacumque investitura sive confirmatione facta a quocumque ordinario dicto fratri Hermano.^(a)