1450.09.09

09-10 September, 1450
Discussion of the Master and Council concerning the problem of the 'election' of Fr Thomas fitzGerot as Prior of Ireland by the brethren of the Irish priory. Though Henry VI and the brethren of the English priory have sent letters in favour of the 'election' they reject this decision as being contrary to the statutes. But after some discussion fitzGerot is again 'elected'. - NLM Arch. 362, fol. 122(123)v-123(124)v. Register. - Edited J. Sarnowsky, Kings and Priors. The Hospitaller Priory of England in the Later Fifteenth Century, in: Mendicants, Military Orders, and Regionalism in Medieval Europe, ed. J. Sarnowsky (Aldershot, Hants, 1999), pp. 83-102, at pp. 100-102. (122[123]v) Postquam die 9a Septembris anni 1450mi, cum esset congregatum consilium in camera paramenti more solito, reverendissimus dominus magnus magister, (1) lectis premissis litteris et bene intellectis, vocari fecit prefatum magistrum Henricum Kynk procuratorem prefati domini fratris Thome ffitzGerot coram sua reverendissima dominatione et suo venerando consilio et interrogavit eundem quid petebat. Qui respondit quod petebat confirmari in priorem prioratus Hibernie dictum fratrem Thomam ffitzGerot electum per fratres preceptores et alios fratres conventus Hibernie, prout in ipsorum litteris bullis eorum roboratis coram reverendissima dominatione sua presentatis late demonstratur, quia eligendi priorem habebant auctoritatem virtute cuiusdam privilegii in capitulo Aquensi alias eis concessi. Quo audito et interrogato si aliud dicere volebat et respondente quod non, jussus fuit e camera consilii abire, ut super eius peticionem deliberaretur.

Deinde immediate examinata diligenter peticione prefata per prefatum reverendissimum dominum magistrum et eius venerandum consilium et quod erat expresse contra formam stabilimentorum religionis, presertim contra stabilimentum felicis memorie condam reverendissimi domini fratris (Antonii) Fluviani Hospitalis / (123[124]r) Sancti Johannis Jherosolimitani magistri,(2) quo cavetur, ne deinceps ellectio baiullivi vel prioris fiat extra conventum, et si facta fuerit huiusmodi ellectio extra conventum sit nulla et nullius valoris. Quorum stabilimentorum virtute et vigore matura consultacione habita, declaratum est, et determinatum concorditer, quod dicta ellectio in Hibernia per fratres dicti prioratus facta nullo modo fieri poterat et quod erat nulla et nullius valoris, et pro nulla haberi voluerunt et declaraverunt. Et per consequens confirmatio similiter dicte ellectionis (est) nulle, fieri non poterat. Qua deliberatione et determinatione habita paulo post, fuit vocatus dictus magister Henricus in consilio et sibi per reverendissimum dominum magistrum relata determinatio sua et sui venerandi consilii super peticione facta per eum confirmando in priorem dictum fratrem Thomam ffitzGerot, ellectum in Hibernia, quia ellectio (erat) nulla et nullius valoris, et confirmatio fieri non poterat de re nulla. Et omnibus displicebat, quod non poterant mayestati serenissimi domini regis Anglie et aliis qui scripserant in favorem ipsius fratri Thome morem gerere et eorum votum satisfacere, quibus auditis dictus magister Henricus recessit.

Et paulo post rediit et se genuflectens exposuit reverendissimo domino magistro et suo prefato venerando consilio, quod in litteris, quas presentaverat, continebant duo capita, unum erat, quod reverendissime dominationes sue confirmarent ellectionem factam de dicto fratre Thoma ffitzGerot in priorem Hibernie, vel si magis vellent dominationes sue et eis placeret, facerent novam provisionem dicto fratri Thome fitzGerot de dicto prioratu Hibernie, et sic humiliter petebat et suplicabat quod dominationes sue facere dignarentur. Quibus auditis dictus reverendissimus dominus magister sumpsit tempus ad deliberandum usque ad diem crastinum, cum suo venerando consilio, super hac secunda peticione de nova provisione ipsius prioratus facienda.

Post hec ut servaretur bona consuetudo conventus ipse reverendissimus dominus magister dedit licentiam venerabili religioso domino fratri Guillelmo Daunnay conventus Rhodi turchupellerio,(3) ut congregaret fratres venerabilis lingue Anglie in dicto conventu residentes, et ad videndum si aliquid esset que dictum prioratum Hibernie petere vellet pro se vel procuratio nomine aliquo-rum (fratrum) dicte lingue absentium, an si ipse frater Thomas ffitzGerot esset magis idoneus, ne cui fiat iniuria, sed jus uniuscuiusque custodiatur.

Die vero decima dicti mensis Septembris anni quo supra coram prefato reverendissimo domino magistro et eius venerando consilio loco quo supra congregato prefatus dominus frater Guillelmus Daunay turcupellerius, presentibus illic procuratoribus venerabilis lingue Anglie existens, retulit se de mandato sue reverendissime dominationis tenuisse linguam super cuiusdam prioris Hibernie faciendi electionem, et quod unanimiter fuerat ellectus et nominatus dictus frater Thomas ffitzGerot, quia erat in scientiis et armis peritus et de magna parentela et potens, et nullus erat aptior ipso ad recuperandum et restaurandum dictum prioratum Hibernie destructum et desolatum ad priorem statum, et ut ipse prioratus ad obedientiam veniret facilius, non obstante quod non fuisset in conventu, neque in dicto conventu fecisset residentiam tanto tempore secundum formam stabilimentorum, non preiudicantes propter hoc alicui vel aliquibus fratri vel fratribus in conventu vel extra conventum existentibus prioratus Anglie in baiuliatibus, preceptoriis, prioratibus et aliis beneficiis vacantibus vel vacaturis in futuram quovismodo. /

(123[124]v) Demum dicta ellectione audita et lingue prefate deliberatione, prefatis reverendissimus dominus magister et suum venerandum consilium ordinatum ad similia in sufficienti numero concorditer fecerunt et creaverunt dictum dominum fratrem Thomam fitzGerot in priorem legitimum dicti prioratus Hibernie. Et eidem de dicto prioratu novam provisionem fecerunt secundum formam stabilimentorum bonorumque morum et consuetudinum religionis. Dictusque reverendissimus dominus magister mandavit michi Ellisseo Delamanna vicecancellario et secretario suo et sacri conventus Rhodi,(4) quod facerem bullas secundum stillum cancellarie dicto domino fratri Thome ffitzGerot de dicto prioratu Hibernie, et sic de mandato sue reverendissime dominationis feci bullas dicti prioratus in modum, que sequitur inferius.(5)

___________________________________________

(1) Fr Jean de Lastic, master 1437-1454.
(2) Master 1421-1437.
(3) Fr William Daunay, turcopolier about 1450-1464.
(4) Acting as Vice-Chancellor under Fr Melchiore Bandini about 1450-1454.
(5) The magisterial bull of Fr Jean de Lastic dated 10 September 1450 follows on fol. 123(124)v-124(125)v.

first adaptation 20.03.2000 Jürgen Sarnowsky / revised 15.09.2008 /
status: proofread /
for any comments: send me an e-mail Juergen.Sarnowsky@uni-hamburg.de (Jürgen Sarnowsky)

Back to the Calendar for 1450