1450.04.16.

Frater Johannes de Lastico [...] et nos conventus Rhodi domus eiusdem [...] fratribus Petro Raymundo Zacosta castellanie nostre Emposte castellano, Giliberto de Loscos prioratus nostri Catalonie priori sive [...] locatenentibus et quibuscunque aliis receptoribus vel administratoribus rerum et negociorum nostri communis thesauri [...] salutem [...]

Tenore presencium vobis et cuilibet vestrum duximus intimandum nos querelam per honorabilem virum amicum nostrum carissimum Johannem Stella mercatorem Barchinonensem nostrum creditorem accepisse continente, quod de summa fl. vigintimillium sibi debitorem per nos et nostrum communem thesaurum, ut constat publico documento, non fuisse, ut ex debito et forma dicti documenti obligamur debite satisfactum, ex quo se se excusavit, dicens, quod nisi de cetero diligentius provideatur ad satisfactionem sibi huiusmodi faciendam, penas in ipso documento contentas, ubi oportebit, infallibiliter accusabit, quodquidem esset dampnum nobis et dicto communi thesauro multipliciter non expectandum.

Et ideo vobis et cuilibet vestrum harum serie duximus committendum atque comittimus et si oporteat in virtute sancte obedientie districte precipiendo mandamus, quatenus de pecuniis ad vestras manus venturis ad nos et dictum nostrum communem thesaurum quavis racione expectantibus et pertinentibus, solutis prius pensionibus sensalium, quibus illas annuatim dare debemus, reluatis summam principalem predictam dicto Johanni Stella debitam, ita et totaliter, quod ipsum debitum sit de primis solutum. Mandantes vobis, ut omnes pecunias a vobis recuperatas et recuperandas que supererint a satisfactione dictarum pensionum antedictorum sensalium in solvendo quittando, satisfaciendo et reluendo dictum debitum convertatis, taliter in hoc vos exhibentes, ut de vera valeatis apud nos obedientes commendari.

In cuius rei testimonium bulla nostra communis plumbea est appensa.