1437.11.15.

In nomine domini amen. Sanctissimo ac beatissimo domino nostro domino Eugenio divina providencia pape quarto. Sanctitatis eiusdem humiles et devoti baillivi, priores et proceres conventus Rhodi, felicitatem cum recommendacione et pedum osculo beatorum.

Ne lupus rapax gregem invadat dominicam et Christi religio viduata in spiritualibus et temporalibus detrimentum paciatur, conditores canonum deliberacione provida statuerunt, ubi prius christiane religionis pastor, viam universe carnis ingreditur, sancti spiritus gratia concedente, de alio legittime provideatur.

Cum igitur pridem die 29 Octobris ex hac vita migrasset bone memorie reverendissimus in Christo pater et dominus dominus frater Anthonius Fluviani olim sacre domus Hospitalis vestri Jh[e]r[oso]l[i]m[itani] magister, et pro eo Deum omnipotentem funereis orationibus demere perorassemus, et vocatis omnibus et singulis, qui eleccioni infrascripte potuerunt et debuerunt interesse iuxta formam stabilimentorum nostrorum et dicte domus, die Mercurii sexta mensis Novembris in ecclesia Sancti Johannis Baptiste colachi nostri conventus, in qua omnes et singuli capitulariter ad sonum campane more solito ad infrascripta specialiter congregati eramus post missam sancti spiritus, nos baiullivi, priores et proceres conventus predicti post nonnullos tractatus inter nos habitos iuxta formam et seriem stabilimentorum / (187 [188]v) nostrorum, a nostris maioribus optimis patribus super ipsa eleccione confectorum et probatorum, insimul nullo penitus discrepante ut moris antiqui laudabilisque consuetudinis est, per viam compromissi vestre premisse hunc inclinate religioni voluimus providere.

Elegimus igitur 13 de nostro conventu fratres fidedignos, scilicet tales personas utique religiosas statum et regulam dicte domus atque conventus optime cognoscentes, et eis plenariam et omnimodam medio sacramento et sacris ecclesie libaminibus dedimus atque concessimus potestatem, quod ipsi 13 possent seu eorum maior et sanior pars posset, sive ex ipsismet 13 sive ex aliis gremio dicte religionis ubique existentibus, dicte religioni ydoneum et utilem eligere ad regimine religionis prefate et conventus predicti et magistrum atque pastorem. Et eleccionem per eos factam in nostra presencia publicarent, promittentes ipsam ratam, gratam et firmam perpetuo habere et tenere, ipsi vero domini electores sive compromissarii sic per nos iuxta formam stabilimentorum nostrorum electi et onus comprimissarie eleccionis huiusmodi in se sponte suscipientes sub sacramento predicto et periculo animarum suarum ad partem se retraxerunt. Et secrete habito inter eos consilio et colloquio de meritis multorum dicte domus venerabillium religiosorum.

Tandem divina gratia ut firmiter credimus inspirati, ad nos ipsi 13 electores in nostro capitulo existentes reversi, de communi omnium spontanea voce, conscientia et voto, nemine protinus discrepante, dixerunt et retulerunt sive unius vice aliorum dixit et retulit in magistrum, patrem, protectorem atque pastorem dicte domus pariter et conventus dicti re[verendissimu]m in Christo patrem et dominum dominum fratrem Johannem de Lastic dicte domus magistrum et tunc prioratus vestri Alvernie priorem sese rite et canonice elegisse.

Et quia nobis, baillivis, prioribus atque proceribus dicti conventus dicta eleccio per dictos compromissarios nostros facta placuit et rite ac canonice factam illam asspicientes eam una omnes, nemine discrepante, acceptavimus, laudavimus et approbavimus, presentibus ultra bullam nostram plumbeam nos manu nostra propria subscripsimus in testimonium premissorum.