1427.09.28.

28 September, 1427
Master Anthoni Fluvia to Petrus de Sancto Martino, citizen of Rhodes: bestowal of the office of consul in Alexandria in Egypt and in the whole territory of the Sultan of Babylon with all incomes, duties and obligations. - NLM Arch. 347, fol. 161r. Register. - Z. N. Tsirpanlis (Ed.), Anekdota eggrapha gia te Rodo kai te Noties Sporades apo to archeio to Ioanniton Ippoton [Unpublished Documents concerning Rhodes and the South-East Aegean Islands from the Archives of the Order of St. John], vol. 1: 1421-1453 (Rhodes, 1995), no.15, pp. 241-242.

Frater Anthonius Fluviani et cetera, dilecto nobis in Christo Petro de Sancto Martino, burgensi nostro Rhodi, salutem in domino.

Gerentes a te magne dilectionis affectum libenter tibi illa concedimus, que tibi redduntur in tuis desideriis opportuna. Speramus, quod ea que tibi duxerimus committenda fidelibus operibus exequeris.

Te, igitur, consulem nostrum Alexandrie, terre Egipti et in toto districtu Soldani Babilonie, et officium dicti Consulatus cum suis honoribus et oneribus, avariis, commerchiis, iuribus et introitibus universis, prout alii consules nostri, predecessores tui, consueverunt facere et habere ac exercere, et non aliter nec alio modo constituimus, ordinamus et donamus, dantes et concedentes tibi Petro plenam auctoritatem, potestatem et balliam in et super hominibus et vassallis nostris pronunciandi, mandandi, cognoscendi et determinandi in eorum litigiis, differentiis et altercationibus; dum tamen iuris ac equitatis formam non excedas, quod, si fecerit, quod non credimus, pro irrito et nullo, ex nunc prout ex tunc, et ex tunc prout ex nunc, habere volumus et declaramus.

Mandantes universis et singulis subditis nostris in dicto loco Alexandrie et eius districtu degentibus ac applicandis, quatenus tibi Petro de Sancto Martino, consuli nostro, ad ea que tangunt honorem et utilitatem nostre Religionis et tui auxilium, consilium pariter et favorem prebeant, et tibi tanquam consuli pareant, obediant et intendant, aminoventes et cassantes ex nunc et abinde in antea Georgium Tanglivermisi per presentes a dicto officio.

In cuius rei testimonium bulla nostra qua utimur in cera nigra presentibus est impressa.

Datum Rhodi in nostro Conventu die XXVIII mensis Septembris MCCCCXXVII.

___________________________________________


first adaptation 27.04.2005 Manuela Plener / revised 02.12.2008 Jürgen Sarnowsky /
status: proofread /
for any comments: send me an e-mail Juergen.Sarnowsky@uni-hamburg.de  (Jürgen Sarnowsky)


Back to the Calendar for 1427