1427.03.20.
Frater Anthonius Fluviani et cetera, et nos Conventus Rodi, domus eiusdem, notum facimus universis et singulis, presentibus et futuris, nos in appaltum dedisse et tradisse insulam nostram Niziriensem religioso in Christo nobis carissimo fratri Regnialdo de Breissolles de Vaulx, preceptori, ad quinque annos proxime venturos, incipiendo a die prima mensis Octobris anni millesimi quadrigentesimi vicesimi septimi futuri, solvendo nostro communi thesauro quolibet anno sexcentos et quinquaginta florenos, prout lacius in literis continetur in ling[u]a gallica superinde confectis, nostri Magistri sigillo in cera nigra coroboratis continetur(a).
De quoquidem vero appaltu fatemur in verbo veritatis, recognoscimus habuisse realiter atque de facto recipisse summam florenorum mille ducentorum quinquaginta. Quamquidem summam volumus per presentes et promittimus bona fide de dicto appaltu super veniente solutione defalcare et in solucionem recepi.
In cuius rei testimonium bulla nostra comunis plumbea presentibus est appensa.
Datum Rodi in nostro Conventu die vicesima mensis Marcii, anno incarnationis domini millesimo quadringentesimo vicesimo sexto.
___________________________________________
first adaptation 13.10.2004 Manuela Plener / revised 02.12.2008 Jürgen Sarnowsky /
status: proofread /
for any comments: send me an e-mail Juergen.Sarnowsky@uni-hamburg.de (Jürgen Sarnowsky)
Back to the Calendar for 1427