1422.10.26.

Harum serie vobis notificamus, quod, cum nobilis vir Anthonius Cataneis, Ianuensis, filius quondam domini Octoboni, militis, a reverendissimo bone memorie domino fratre Iohanne de Heredia, Magistro, predecessore nostro, mutuo tria millia florenorum currentium Rodi accepisset, ut constat verissimis documentis, et per mortem olim prefati domini Magistri predicta tria millia floreni devoluta fuerunt nostro communi thesauro, ut moris est nostre Religionis, et per consequens ipse Anthonius et eius bona et res prefato communi thesauro remanserunt obligata, cuius summe exactio ipsi communi thesauro spectat; tamen ex quibusdam racionabilibus causis, quas hic referre pro presenti non est necesse, de nostra certa scientia et speciali gratia, prefatum nobilem Anthonium et heredes suos liberamus, absolvimus et quittamus per imperpetuo a dicta summa trium millium florenorum currentium Rodi, et cum et cetera prefatus nobilis Anthonius, dum supradictus dominus Magister agebat in humanis, administravit, gessit (fol. 174^v) et levavit et solvit de bonis [et] rebus nostro communi thesauro spectantia et pertinentia, nos prefatus Magister et Conventus non solum de tribus millibus florenis currentibus Rodi, sed eciam de cunctis et quibuscumqe aliis rebus et bonis per prefatum nobilem Anthonium receptis, habitis et recuperatis, tam ipsum quam omnes suos heredes et successores liberamus, absolvimus et quittanciam facimus generalem per presentes nostras literas perpetuo valituras, mandantes et precipientes omnibus fratribus domus nostre, sub virtute sancte obediencie, districtius precipiendo, ne contra has patentes literas, verbo vel facto, audeant facere vel venire, quinimo, iuxta earum mentem et seriem, studeant inviolabiliter observare.