1422.01.20.

20 January, 1422
Master Antoni Fluvia to Marietta (Staurion), Doukena and Angelina, the three daughters of Georgius Bertranin: releases them from the servitudo marina ('slavery of the sea'); he also frees Bartholomeos from Rhodes and Thomas from Ammoshostos with his wife Mary, remits their debts and furthermore releases Arfradena, the wife of Bertranin. - NLM Arch. 346, fol. 164r-v. Register. - Z. N. Tsirpanlis (Ed.), Anekdota eggrapha gia te Rodo kai te Noties Sporades apo to archeio to Ioanniton Ippoton [Unpublished Documents concerning Rhodes and the South-East Aegean Islands from the Archives of the Order of St. John], vol. 1: 1421-1453 (Rhodes, 1995), no.4, pp. 221-23. (fol. 164r) Frater Anthonius Fluvian et cetera, et nos Conventus Rodi et cetera, dilectis in Christo nobis Mariete alias Stauriani, Duquene et Angeline, filiabus dilecti et fidelis servitoris nostri ser Georgii Bertranin, patris vestri.

Rogatibus moti ac deuocionis vestrarum amore, quo(a) nos et dictam nostram domum sincero affectu una cum dicto genitore vestro continuo coluistis, ad prosequendum vos prerogativa honoris et gratie specialis nos inducentes, ut, quanto vos favorabilius prospexeritis(b) nostra munificencia et gratia prosecutas, tanto erga nos et eamdem domun nostram vestre fidei puritas continua suscipiet incrementa.

Vos, itaque, predictas ab hodie in antea, a vestris et vestrum qualiter corporibus legittime descendentes et ab eisdem descendentibus et earum corporibus successiva linea perpetuo legittime descendentes, a servitute et servicio marine seu marinarie, quo nobis et ipsi nostre domui estis astricte et tenemini, invicem deliberato consilio, de nostra certa scientia et speciali gratia, auctoritate presentium absoluimus facimusque inmunes, sicque quod in antea sitis franche, libere et francomate.

Rursum tres, videlicet duos masculos et unam feminam, quorum nomina hic exprimuntur, videlicet (fol. 164v) Thomam de Famagusta et Mariam, eius uxorem, et Bartholomeum de Roddes, quos et quam in recognicionem dicte gratie et ut loco vestrarum dictum marine seu marinarie officium sive servicium exerceant nostre prelibate domui, de ipsorum spontanea voluntate se ipsos ac etiam illorum per imperpetuo descendentes prebuistis, eos et eam dictam domum nostram seu eius communem thesaurum habuisse recognovimus, presentium serie fatemur et de eis vos perpetuo tempore absoluimus et quittamus.

Mandantes universis et singulis fratribus domus nostre, presentibus et futuris, cuiuscumque status, gradus vel condicionis existant, sub virtute sancte obediencie, firmiter et districte, ne contra predictam nostram gratiam, libertatem et immunitatem aliquantenus venire presumant, verum eam iuxta eius tenoris continenciam studeant efficaciter perpetuis temporibus inrefragabiliter observare.

In cuius rei testimonium et bulla nostra comunis plumbea presentibus est appensa.

Datum Rodi in nostro prefato Conventu die vigesima mensis Januarii, anno incarnationis domini millesimo quadrigentesimo vigesimo primo.

Insuper, dominam Arfaradenam, uxorem ser Georgii Beltrani et matrem dictarum filiarum, manumitimus et liberamus et omnem prolem in futurum supervenientem ab eadem, et ab omni servicio marinarie. Datum, ut supra.

___________________________________________

(a) In front of this word was written and then crossed out: quod.
(b) In front was written and then crossed out: prosperiti.

first adaptation 10.10.2004 Manuela Plener / revised 02.12.2008 Jürgen Sarnowsky /
status: proofread /
for any comments: send me an e-mail Juergen.Sarnowsky@uni-hamburg.de (Jürgen Sarnowsky)

Back to the Calendar for 1422