1402.04.06.

Frater Philibertus de Nailhaco etc. [...] fratri capitaneo civitatis Smirnarum eiusque successoribus salutem etc,

Ad sinceritatis vestre noticiam adducimus per presentes, quod nos, dirigentes intuitum ad fidelia gratuita obsequia nostre religioni per olim Jacobum de Seminato dicte civitatis connestabulum impensa circa solicitam custodiam dicte civitatis et que super hec eidem religioni, speramus Angelinum de Seminato, dicti Jacobi filium, sui patris inherendo vestigiis. Impensurum huiusmodi consideracione ordinavimus de primo officio connestabuli dicte civitatis dicto Angelino fore providendum, dum casus et facultas vacacionis occurrent.

Quapropter volumus vobisque mandamus, ut dicto Angelino et nulli alii iuxta ordinacionem et voluntatem nostras casu vacacionis huiusmodi officii occurrente, cum stipendiis, soldea et iuribus solitis et debitis percipi primum vacaturem officium connestabuli concedatis.

Data Rodi die sexta mensis Aprilis anno incarnationis domini millesimo quatercentesimo secundo.

Insuper adicientes post datam, quoniam volumus, ut dicto Angelino quousque officium connestabuli fuerit assecutus, ut prefertur, detis et solvatis anno quolibet soldeam seu stipendia sibi dari consueta per predecessores vestros, dicte domus fratres Guillelmum de Mute, hospitalerium, Anthonium de Verneyo et Buffellum Pannizati, admiratum, dicte civitatis capitaneos. Data ut supra.