1381.03.28.

Frater Johannes etc. [...] fratri Jacobo de Leone domus eiusdem capitaneus Smirnarum salutem etc.

Nobis commisse dicte civitatis custodie sarcina exigit gravia dispendia, que fidei catholice evenirent verisimiliter, ipsius spreta custodia nos compellunt ac etiam nostra professio nos adducit disponere et providere, ut ipsa civitas circumdata ipsius inimicis, conservata usque ad hec tempora ab eorum insidiis, custodiatur fideliter, quod nusquam fieri potest, postquam extirpatis stipendiariis infidelibus siquidem sint ab eadem.

Cumque fama referente ad nostrum proveniret auditum, quod Nicholaus Ribaudi, stipendiarius dicte civitatis et gerens officium scagliarie, spreto fidelitatis iuramento sedi apostolice, nobis seu deputatis a nobis prestito, cum dicte sedis, nostris et dicte civitatis inimicis secreta conventícula seu colloquia trataverit et habuerit, statum dicte civitatis et ipsius incolarum revellaverit et alia egerit, que in dispendia^(a) predictorum, sedis, nostri et civitatis, redundantur, et possent gravia generari dispendia, quibus et aliis, que in offensare predictorum possent ullatenus redundare, informari cupientis.

Et predictum Nicholaum condigne, prout meruerit, puniri vobis, de cuius industria et probitate confidimus, tenore presentium comictimus et mandamus sub virtute sacre obedientie, quatenus eo ipso^(b), quo perveniretis ad dictam civitatem, dictum Nicholaum, contra quem de premissis fama laborat, faciatis capi et captum detineri vosque de premissis et quolibet premissorum modo debito, prout rationi congruit, informetis, qua informationem factam, si culpabilis in aliquo reperiatur, puniatis pena condigna, ut ceteres cedant^(c) in exemplum.

Datum Rodi sub impressionem sigilli nostri die 28 mensis Marcii anno incarnationis octuagesimoprimo.