1525.04.19.

Allen unde enen isliken desse tzertere zeende edder horende lesen sy witlik unde openbar,

dat de ersamen unde vorsichtigen her Jochim Nyele, radtman, Allert Salborch, Jochim Moller unde Clawess Kalen, borghere to Hamborch, alse testamentariesze seligen Albert Wulhasen, wandaghes borgers to Hamborch, myt deme beschedenen manne Gherd Hollen, borghere darsulvest, synt aver een ghekamen theynn marck gheldess halven, also dat sulve testament myt eme jarlikesz hefft in synem erve, beleghen vor dem kerckhave santi Nicolai uppe dem orde na der nyenborch by dem wanhuse sunte Nicolai, dar nu tor tydt Ilsebe Rikwerdesz inne wanet, alse dat de vorbenomeden testamentariesze deme ghedachten Gherd Hollen en heel jar rente, nemliken theyn mark pennynghe, hebben inghelaten, so de bedaghet weren uppe Passchen anno etc. vyff unde twintich.

Der woldat danknamich to wesende, hefft de vorghetekende Gherd Holle vor sick unde syne erven den vorbenomeden testamentarieszen unde eren nakomelingen togesecht unde ghelavet, lavet unde tosecht jeghenwardich in unde myt krafft desser tzerter, dat he unde syne erven deme vilghenanten testamente so- dane theyn marck geldes in den negest volgenden soss jaren nicht willen noch schollen uthlosen. Unde dat erste jar to rentende stunt an uppe ghyffte desser tzerter, unde dat leste jar schal gheendighet unde umme ghekamen syn, alse men schrivende wardt na desser tzerter een unde dortich; denne so schal de losynghe Gherd Hollen unde synen erven wedder vrygh stan.

Dess to orkunde unde tuchnisse der warheit synt desser tzertere twe, enes ludes, de ene uth der anderen averdat wordt warheit ghesneden, der de ene by den upghenanten testamentarieszen unde de ander by Gherd Hollen synt in bewaringhe.