1522.09.02.

Witlik apenbar allen, de dessen bref seyn edder horen lesen, dat de swaren der veer caspele to Hamborg, benomeliken de van sunte Peter, Nicolai, Katherine unde Jacobi, sampt den borgeren unde warkmesteren der ampte darto getagen, eyn ider an synem caspel, hebben sik bespraken umme marklike gebreke unde orsake se darto bewegende van wegen der geestliken overicheit, welkere itzundes unde in vorleden tyden myt citacien, inhibicien unde banne de borgere vorungelimpen und averfallen, nicht allene in saken der geestlicheit bedrepende, den ok in warliken handelen unde saken baven alle billicheit sik bekummeren unde dagelikes undernemen, hebben ok de karkheren der caspele up unde afgesettet ane willen edder consent der swaren to wat tiden unde so vaken ene dat beqweme was. Darto heft de scholaster sik der scholen underwunden myt yarliker pension markliken besweret, de doch der karken sancti Nicolai tobehorich nach vormeldinge segelder breve, lofwerdiger instrumente, pawestliker hillicheit darup gegeven.

Ok nympt de wyelbischop untemelik lon van den karken, cappellen, altaren, karkhoven etc. to wyende. Dewyle desse unde mer ander gebreke allen gemenen borgeren to nadele unlytlik ys, derhalven avereyngekamen, samptliken vorplichtet, gelavet unde togesecht de vorgemelten veer caspele myt den borgeren in dessen edder anderen richtigen saken under malkander byplichtinge hulpe unde trost to donde, dat sodane geestlike besweringe bet herto allen gemenen borgeren to nadele edder schaden schole vorbliven unde afgestellet unde de schole to sunte Niclawese to erer borliken rechticheit gebrocht moge werden, ok, of welk der anderen caspele schole borlikerwys worden uprichtende, darinne behulplik unde bystendich to synde sodans to vullenbringende, laven dat ene caspel van dem anderen nicht to tredende noch orsake der utsunderinge to erdenkende, den stede, truweliken, vast by eyn to blivende, so dat eyn der veer caspele nicht allene, sunder myt willen, apenem weten unde rade der anderen in dessen saken handele, alle moye, unkoste edder geltspildinge nu edder in tokamende tyden darvan erwassen mochte, willen samptliken gelik dragen.

Geschege ok, dat jenich borger myt geistliker edder warliker overicheit vorungeliket edder averweldiget worde, dat den swaren geclaget edder angebrocht, dem scholen ok willen se hulpe unde bystant don wedder sodane gewalt edder ungelik nach allem vormoge in synen richtigen saken, beholden eynes ersamen rades borlike richtewalt nach vormoge unser stadboke. Alle vorschreven artikele to achtervolgende laven wy geswaren der veer caspele stede, vast, truweliken to holdende vor uns unde unse nakomelinge, unde hebben to merer tuchnisse der warheit desser breve veer eynes ludes myt der veer karken wontliken ingesegel benedden angehangen, warvan by etliker karken eyn desser breve in vorwaringe.