1512.08.05.
Unsen fruntlichen gruth mit vermoge alles guden tovoren.
Ersame, wise heren, wy hebben unlanges geleden juwen wisheyden gescreven von Folffe tho Inhusen, von der warschuwinge dem heren Benthem unde insaten von West-Vriesland, dergeliken wo de breve der warschuwinge uppe den 20. dagh Julii verleden ersten an de von Groningen gelangt, darvon begerende antwerde, wo desulven breve vermelden. Also is unsem boden geseght, de breve helden neyn antworde, welk uns befremdet, unde also sunder antworde wedder by uns gekomen, worumme begeren frundlichen uns noch by jegenwordigen willen beantworden, wente uns daranne mergklich is gelegen, wo ok unse vorschrifte vermelden, de parte, den ere schepe angehalet, liggende hyr tor groten koste. Juw hyrinne gutlich ertegen, vorschulden wy gerne, Gode bevolen.
Screven ame dage Oszwaldi anno etc, 12 under unse signeten.
Burgermeister und rathmanne tho Hamburgh.
___________________________________________
erste Anlage 21.8.2017 Jürgen Sarnowsky / nach der Edition, nicht mit dem Original kollationiert / letzte Bearbeitung: 21.8.2017 / für Rückfragen: Juergen.Sarnowsky@uni-hamburg.de (Jürgen Sarnowsky)
zurück zur Regestenliste für 1512