1501.03.16.

In dem namenn godes amenn.

Wy Meyneke Meyger, borger, unde Wobbeke, deß gedachten Meynekes elike hußfrowe, bargersche to Hamburgh, gesunt van lyve, van der gnade godes vulmechtich unnßer synne unnde witte, hebben sorchvoldich avergetrachtet, dat wy alße alle mynschen sterven mothen, nicht wetende wo unnd wan. Dat uns denn de doeth nicht unvorsichtliken, vorsnelle unnde sunder schickynge unnßer guder vorsterven, szo sette ik, Meyneke Meyger, var my sulvest unnde ik, Wobbeke, dorch den erßamen Hermen Thun, borger to Hamborch, mynen elikenn vormunth, dar to vor dem erßamen rade dusser erentriken stadt sunderges gekaren unnßer beyder sampt testament unnde latesten willen in dusser nha screven wyße.

Interste wan goedt almechtich aver unß gebedende unnde van hir esschende werdt, ßo bevelen wy unße armen zelen in dhe bermharticheyt godes unnde vorbyddent syner leven moder Marien unde willenn, dat unnße corpore, offte wy hir vorstorven, nha cristliker wyße tor erden schullen werden gestediget. Szo nheme ik, Meyneke Meyger, upp de stunde mynes dodes, dat ik myner personen halven van mynen frunden unnde erven my blodes halven belangend nhen erffguedt entfangen hebbe. Der geliken ik, Wobbeke, nheme dat upp de stunde mynes dodes, dat ik anders van mynen frunden unnde erven nicht entfangen hebbe, den allene mynen bruthschat, de sik beloppet ann gelde upp viff unnde sostich marck. Weß wy denn vorder hebben unnd nalatende werden, hefft uns godt almechtich dorch unnße vlitich unnde sorchvoldich arbeyt mildichliken unnde gnedichliken vorlenet unnd togevoget. Dar van wy geven interste to beteringe wege unnde stege eyn ißlik achte schillingk lubesßk. Vorder ßo geve wy der kerken to Sunte Nicolawes tegen marck pennynge to der kerken buwte. Dar van schullen de kerkswaren beschaffen by dem kerkhernn unnde synen willen maken, dat alle szondage unnßer, unnßer oldernn unnd woldeder[nn] zelen dechtnisße van dem predichstole geholden werde. Vorder ßo geve wy den geistliken vederen deß closters Sunte Johannes vyff marck pennynge, ok den vederen to Sunte Marien Magdalenen vyff marck pennynge. Begeren dat ße in beyden closteren unnßer, unnßer olderen unde woldedernn zelen alle szondage van denn predichstolen willen gedenken. Willen ok, dat dhe jenne, dhe van uns beyden dat lather levent beholdet, thorstundt nha deß anderen dodes schall enthrichten ßulk gelt, dat godt alweldich der zelen genade.

Item szo geve ik Meyneke nha mynem dode armen kinderen unnd juncfrowen tho beraden vofftich marck lubesß, dhe my Hinrik Maeß wanafftich im kerspell tor Sesster by Uthersten witlik schuldich iß, unde dar var gelavet hebben Johan Schinkel unnde Alberdt Meyne darsulvest wanafftich. Item szo geve ik Meyneke nha mynem dode mynem bruwerknechte Corde baven syn rechte loen umme synes truwen denstes willen tegen mark pennynge, myner maget Metteke vyff mark baven er[en] loen, dhe mhen on[en] uth den redesten unnd sammend gude schall enthrichten.

Vorder mher alße ik Meyneke, god geve in saliger stunde, gedenke tho reyßende tho dem hilgen appostel god[es] Sunte Jacob, nicht wetende wath anfalles my wunderwegen muchte bejegen, szo hebbe ik ahngeßeen mannichvoldige denste unnd willen, dhe my myne werdynne hefft bewyßet, ok dat ße sampt myt my unnßer twyger gueth hefft sorchvoldichgen helpen vorwerven, szo geve ik myner werdynnen Wobbeken myn andell, dhen ik hebbe ahn twintich mark geld, dhe unß samptliken thokamen, beschedelikenn tegen margk geldes in Hinrik Hekedeß erve belegen upp dem Burstaven, nach tegen mark geldes in Hermen Tunß erve darsulvest belegen, dar tho alle unnße ingedomthe, kysten, kysten gerede, kannen, ketell, grapen, bedden, bedde want, ßo wy dat samptliken gebruket hebben, korth unnde kleyn, nichtes buthen bescheyden, dar to alle ere kleder, clenodia, sulversmyde unnde frowelike cyringhe, dat tho erem lyve gedenet hefft, szo dat ße deß alle mage gebruken, keren unnde wenden nha alle erem willen, ßunder myn, myner erven unnde enes juwelkes insage effte sperynge.

Der geliken ik, Wobbeke, dorch mynen vorscrevenen vormunth geve Meyneke Meyger mynem eliken hußwerde, iffte he dat later levent behelde, mynen anthall van denn vorscreven twintich marck geld, dar tho alle ingedometh unnd gyffte, dhe he my thogerekent unnde gegeven hefft, in aller mathe ßo baven screven iß, umme sunderger leve willen, alße wy im echten state wudermalkander gelevet hebben, der ok nha mynem dode rowliken togebrukende. Dat denn nha unßer twyger dode neyn werre ifte twidracht van beider parte frunde irryße, ßo geve ik, Meyneke, mynen negesten erven hundert marck pennynge, dar mede schal myne werdynne geschichtet unnde gedelet syn van mynem erve. Unnde ik, Wobbeke, geve der geliken hundert marck mynen rechten erven nha mynem dode in wedderstadinge mynes bruthschattes, unnd wes ik van mynen vrund[en] entfangen hebbe, dar mede myn hußwerdt van mynen frund[en] ok schal gedelet syn. Duth unßer twiger testamente tovorstande unde thoachterfolgende setten wy unnde keßen de erßamen Heyne Buttow unnde Tile Smydt, borger to Hamborch, vor testamentarien unnde willen, dath dith sulffte unns[er] testament by [vuller macht] werde blyven szo lange, wy dat muntlik efft scrifftlik wedder ropen. Hir ane schall de erlike radt dusser stadt erß rechten unvorsumeth syn. Hir ahn unnde aver syn geweßen de erßamen hernn Hinrick Moller unnd Johan van Sprekelsen, sunderges van dem rade dar togefoget.