1497.05.17.

In godes namen amen.

Ik Werneke Scroder, borger to Hamborgh, begrepen mit lifliker kranckheid, doch van der gnade godes vulmechtich unde wittich alle myner synne, vornuft und redelicheid, hebbe gesettet unde maket myn testament unde lesten willen in nabesrevener wise. Interste alse ik na godes esschinge vorsterve, so bevele ik myne armen sundigen sele in de barmharticheit des almechtigen godes, der vorbiddinge der hochwerdigesten moder Marien unde aller hilligen unde begere, mynen licham cristliker wise tobegravende unde my herliken tobegande.

Unde geve interste van mynen gudern achte schillingh to wegen unde stegen. Vort so geve ik myner eeliken husfrouwen, Katherinen, umme sunderge denste, willen und woldat my bewiset eren brudschat, ere beste bedde mit aller tobehoringe, alle ere kleder mit dem smyde, ere frouweliken klenade, kisten pand unde tziringe, so se de to my gebracht unde bii my getuget heft, nichtes buten bescheden, de se alle vor der erfliken delinge, mynen erven unde frunden na stad rechte todonde, tovorn uthnemen, rouweliken beholden unde bruken schal na erem willen, sunder myner erven und enes isliken, he sii geistlick ifte werdlick, wedderseggend unde hinder. Myne andern guder scholen desulven, myn eelike husfrouwe unde negesten erven, na desser stad rechte delen. Doch so schal de ersame rad to Hamborgh in dessen giften eres rechtes unvorsumet wesen. Wil unde beger, dat desset myn testament unde lateste wille bii vuller macht blive unde unvorbroken geholden werde, id zii denne, dat ik id mundliken und witliken wedderrope. Sette unde kese vor myne testamentariese de vorsichtigen menne Hanße Mors, Ludeken Wiighorst, Kersten Warendorp unde Hinrike Borsteld, alle borger to Hamborgh, se frundliken biddende, desset antonemende und dar bii todonde, so ik ene wol betruwe. Geve ene ok vullenkomen macht, wan erer eyn vorstervet, dat de andern enen edder meer vromer menne wedder to sik kesen mogen, wanner unde wo vaken deß todonde und behoff is.

Hir ane unde over hebben gewest de achtbarn hern, her Kersten van der Hoye und her Hermen Rodenborgh, radmanne to Hamborgh van dem erbarn rade darsulves hir sunderges togeschicket, sik des tovordenkende. To orkunde und tughnisse aller vorscreven stucke sint desser testamente und scrifte twe enes ludes eyn uth dem andern gesneden over dat word warafticheid, der eyn bii dem rade und dat ander bii myner ergenan[nten] husfrouwen sint in vorwaringe.