1497.04.14.

In god[es] namen amen.

Ik Hinrick Manningh, borger to Hamborgh, by wolmacht myner redelicheit, vornuft und wetenheyt, hebbe avergetrachtet de gebrekelicheit der mynschliken nature, so dat ick alse alle mynschen des naturliken dod[es] yo sterven mot und doch nicht en weth de tiid efte stunde des dod[es]. Hirumme dat my de dod nicht unvorsichtigen avervalle, und up dat neen werre, kyf edder ander vordreth na mynem dode, onbeswaringe myner armen sele, van myner tiidliken guder wegen dorna irrisen und upstan, so sette ik tovoren myn testement und lesten willen in desser nascre[ve]n wise.

Interste bevele ik myne sele inde barmherticheit des almechtigen god[es], vorbiddinge der junckfrowen marien und alle god[es] hilgen und neme dat uppe des stunde mynes dod[es], dat ik baven sodan[e] guder, alze ik mit Metken, myner eeliken husfrouwen, genomen hebbe, nenerleyge erfgud entfangen hebbe. Wes ik anders hebbe und nalate, heft my god alweldich vor middelst mynem und myner husfrouwen flitigem unde sorchvoldigem arbeide gnedichliken vorlenet. Und dar van gheve ik interste achte lubesche schillinge to wegen und stegen.

Vortmer gheve ik Metteken, myner vorscre[ve]n husfrowen, alle myne nalaten gudere, grot und klene, wo se syn, nicht[es] uthgenomen, der to brukende to erem besten sunder myner erven und eneß ydermanß inseggent. Unde dit testement mede to vorstande unde mynen lesten willen mede vullentobringende, sette und kese ik de ersamen Mathies Hermenßborgh und Meyneken Scroder, borghere to Hamborgh, und beghere, dat se dat willen annemen, wan de tiidt kumpt, und also vorstan, alse ik en wol to truwe, und se vor gode willen bekant wesen, und gheve ene vullenkomen macht, wanner erer eyn vorstorven iß, dat de ander enen fromen man moge wedderkesen in de stede des doden, so vaken des to donde is.

Ok wil ik, dat dit testement by vuller macht blive so lange, dat ik dat muntliken wedderrope. Und in dessem testemente schal de erlike rad to Hamborgh erer stad recht unvorsumet wesen. Hir sint mede an und aver wesen de ersamen heren Hermen Bekendorp und Mathies Schiphower, radmanne van dem rade sunderghen hirto gevogeth. To merer tuchnisse sint desser testemente twe allenß ludes, dat ene uth dem anderen sneden aver dat word salus, der dat ene yß by dem rade und dat ander by my und mynen testamentarien in vorwaringe.