1486.04.05.

bekenne unde betuge opembaer in unde mit crafft dusses breves vor my unde myne erven, vor alszweme, so alsz etlick unwille unde mishegelicheyt twischen uns unde den ersamen steden Lubeke unde Hamburgh, etlikermathe entstanden, dat denne sommighe jaere van tyden to tyden ghevatet, in gude unde fruntliken bestande ghewest is, welck lateste bestandt nu uppe Meigdach erstkamende werdt uthgande unde expirerende, dat denne de erszamen heren borgermeistere unde radt der stadt Bremen noch to enem jare, nomptlick van Meigdaghe erstkamende beth Meigdaghe over dat jaer, nomptliken anno etc. sevenundeachtentigh, vorthan eyn seker, vast, velich, unvorbrecklyck gutlick bestandt bearbeydet.

Welck bestandt ick unde myne erven belevet heben unde jegenwardigen beleven in crafft dusses breves, so dat de upgedachten stede Lubeke unde Hamburgh myt alle den eren unde eren tostenderen mit live unde gude der vorberorden schelinge halven in unsen lande unde gebede vor uns, de unse unde alle der wy moghe unde mechtich sin to water unde lande, frigh, velich, umbeschediget unde umbehindert, sekerlick moghen wanken, varen unde keren wedder unde vorth, allet sunder gheverde unde jenigerleye argelist.