1483.12.01.

1483 Dezember 01. Hamburg.
Regest: Testament von Bertram Veltbergh.
Überlieferung: StAHH, Classis X Vol.4 Series I 1483 XII. 1.
Beschreibung: Kerbschnitturkunde auf Pergament. Vermerk von alter Hand auf Rückseite:
Testement Bertram Veltbergh lxxxiii sowie die Jahreszahl 1483 von späterer Hand. Edition: --.

In godes namen amen.

Ik Bertram Veltbergh, borgher to Hamborgh, by wolmacht mynes levend[es] unde redelicheit myner synne, hebbe avergetrachtet de gebrekelicheit der mynschliken nature, so dat ik alse alle mynschen des naturliken dodes yo sterven moet unde doch nicht en weth de tiid efte stunde des dodes. Hirumme dat my de dot nicht unvorsichtliken avervalle, so sette ik tovorn myn testement unde lesten willen in desser nascreven wise. Interste bevele ik myne sele inde barmherticheit de[s] almechtigen godes, vorbiddinge der iuncfrouwen Marien unde alle godes hilgen unde neme dat uppe myne lesten hennevart unde stunde mynes dodes, dat ik nenerleige erfgudere en hebbe. Sunder wes ik hebbe van tiitliken guderen, de heft my god van sinen gnaden unde mynem suren arbeide mildichliken togevoget unde vorlenet.

Unde dar af gheve ik mynes deles interste to wegen unde stegen teyn mark penninge. Vortmer geve ik to dem dome teyn mark to dem buwe. Item teyn mark to sunte Peters tom buwe. Item teyn mark to dem kalande tom dome. Item vif mark der armen scholer broderschop. Item vif mark to sunte Jacoppe tom buwe. Item vif mark to sunte Nicolawese unde vif to sunte Katherinen to buwe. Item teyn mark to sunte Johanse to deme buwe unde teyn mark inde koken. Item gheve ik druttich mark to Veltbergen der kerken tom buwe. Item gheve ik twintich mark to wande unde schoen inde ere godes. Item geve ik vif mark penninge den beghynen indem convente.

Vortmer gheve ik Arnd Kokes husfrouwen Greteken, myner meddern, unde eren kinderen soshundert mark lubesch unde ene sulveren kannen unde enen sulveren schouwer. Item geve ik furder Bertram, myner suster sone, twehundert mark unde den groten sulveren beker.

Wes ik denne furder nalate van tiitliken guderen, de syn bewechlik unde umbebechlik, klene unde grot, nichtes uthgenamen, schal hebben Anneke, myn husfrouwe, sunder ienige delinge edder erffschichtinge dar van to donde, unde bruken der to erem besten unde late bidden vor myne sele.

Unde dit testement mede to vorwarende unde mynen lesten willen vullen tobringende, sette unde kese ik de ersamen manne Copeken Blucherd unde Peter Sommerland, borgere to Hamborch, unde beghere, dat se dat annemen willen, wan it sik behoret, unde so vorstan, alse ik en wol truwe unde se vor gode willen bekant wesen. Unde eft erer eyn van dodes wegen afginge, so schal de ander vulkamen macht hebben, enen anderen erliken man inde stede to kesende. Ok wil ik, dat dit testement by vuller macht blive so lange, dat ik dat muntliken wedderrope. Unde in dessem testemente schal de ersame rad to Hamborgh erer stad rechtes unvorsumet wesen.

Hir sint an unde aver wesen de ersamen manne her Diderick Wunstorp unde her Jurgen Lamme, radmanne to Hamborgh vandem rade sunderges hirto geschicket, sik to vordengkende. Unde to merer warheit sint desser testemente twe allens ludende dat ene uth deme anderen sneden aver dat word misericordia, der dat ene is by dem rade unde dat ander by my unde mynen testementarien in vorwaringe.

Unde is geschen na der bord Christi unses heren indeme verteynhundertsten unde dreundeachtentigesten jare am Mandage na sunte Andreas dage des hilgen apostels.

___________________________________________



erste Anlage 07.03.2004 Mathias Nagel / letzte Bearbeitung 04.01.2009 Jürgen Sarnowsky /
Bearbeitungsstand: am Original erfolgte und korrigierte Transkription / für Rückfragen:
Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1483