1483.09.11.

1483 September 11. Hamburg.
Regest: Testament von Kersten Warendorp.
Überlieferung: StAHH, Classis X Vol.4 Series I 1483 IX. 11.
Beschreibung: Kerbschnitturkunde auf Pergament. Vermerk von alter Hand auf Rückseite:
Testement Kersten Warendorpes sowie von späterer Hand Kersten Warendorp 1483. Edition: --.

In godes namen amen.

Ik Kersten Warendorp, borger to Hamborch, wo wol ik nu tor tiid krenkelik byn an mynem live, so byn ik doch myner synne unde redelicheit vulmechtich, des god een ewich lof hebbe, unde hebbe overdacht unde overtrachtet, dat ik unde en yslik mynsche io sterven moeth unde nicht wissers is den de doet unde nicht unwissers dan de stunde des dodes allen mynschen junk unde oeld, de hiir levet in dotliker achte. Na deme dat de vele werres an erem gude nalaten, de ane testament vorstervet, hiirumme begere ik, oft god over my bode unde [ik] van dodes wegen afginge, sodane werre tovoren to besorgende. Unde wil, dat desse iegenwardige schickinge myn leste wille unde testament wesen schal mynes gudes, dat my van nenem erfliken anvalle tokomen is. Also ik dat neme uppe de stunde mynes dodes unde uppe myne sele, dat ik nenerleye ervegud upgeboret hebbe. Men dat ik hebbe unde nalate van gude, dat is myn wunnen gud also my god dat vormyddelst mynem sorchvolden arbeide vorlenet heft.

Unde van deme sulven gude geve ik in godes ere umme salicheit willen myner sele Gerbrechte, myner eeliken husvrouwen, unde Wobbeken, myner werdynnen broder dochter. To deme ersten bevale ik in godes gnade myne sele unde myn liiff by levende unde by dode na cristliker wyse. Dar negest geve ik achte schilling penninge to wege unde to stege.

Vortmer geve ik Wobbeken, myner werdynnen broder dochter, twintich mark penninge uth den redesten guderen unde een bedde myt enem hovetpole, also it sik er temet mede to gevende, wanner se beraden wert.

Vurdermeer geve ik Gerbrechte, myner eeliken husvrouwen, umme woldaet willen, de se my bewiset heft, alle myn ander nalaten gud, bewechlik unde umbebechlik, wor ik dat hebbe bynnen efte buten Hamborch, it sy an liifrenthen, an sulver smyde, vorguldet unde unvorguldet, an klederen, an gelde, an ingedomte, it sy watterleye dat sy, wo men dat heten wille unde moge, kleen unde groeth, wor unde by weme dat it sy.

Unde in allen vorbenomeden giften schal de rad to Hamborch van der stad wegen eres rechtes unvorsumet wesen. Alle vorscreven stucke to vorwarende unde myne testamentarii to wesende, dar kese ik to unde bidde de eerliken lude Ludeken van dem Herte unde Ludeken van Krelen unde bidde se andechtigen, dat se dit testament to vorstande annamen, wan sik dat geboret, unde dat vorstan, also ik en des to belove unde se vor gode willen bekant syn. Unde ik wil, dat alle vorbenomede stucke stede, vast unde unvorbroken bliven so lange, wente ik se redeliken wedderspreke. Ok geve ik mynen vorschreven testamentarien vulle macht, icht erer een vorstorven were, dat de andere wene kesen moge, wo dicke des behoeff is, in des vorstorvenen stede.

Unde hiir hebben an unde over wesen de erbaren hern Otto van deme Mere unde her Kersten van der Hoye, radmanne to Hamborch van deme rade dar sulves sunderliken togevoget, sik des to vordenkende. Desses vurder to ener tuchnisse der warheit is desser testamente twe alleen ludende dat ene uth deme anderen gesneden dat wordeken Maria, dat ene by deme rade unde dat ander by den testamentarien.

Screven na godes bord veerteynhundert dar na in deme dreundeachtigesten jare des Donredages vor crucis exaltacionis.

___________________________________________



erste Anlage 07.03.2004 Mathias Nagel / letzte Bearbeitung 04.01.2009 Jürgen Sarnowsky /
Bearbeitungsstand: am Original erfolgte und korrigierte Transkription / für Rückfragen:
Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1483