1483.06.07.

In godes namen amen.

Ik Cord Witte, borgher to Hamborch, by wolmacht mynes levendes unde redelicheit alle myner synne, hebbe sorchvoldigen overtrachtet de ghebreklicheit der mynschliken nature, so dat ik alse alle mynschen des naturliken dodes jo sterven moet unde doch nicht kan weten de tyd edder wyse des dodes. Hir umme hebbe ik minen lesten willen unde myn testament gheschicket unde maket in desser nascreven wise. Int erste alse ik vorsterve bevele ik mine armen sundighen zele in de bermherticheit des almechtighen godes, vorbiddinghe der juncfrouwen Marien unde aller hilghen unde beghere, dat men my erliken to der graft bringhe unde na loveliker wonheit der stad Hamborch beghan late. Unde neme dat uppe de stunde mines dodes, dat ik nynerleye ervegut hebbe entfanghen. Men wes ik hebbe, heft my got almechtich vor middelst mynem suren arbeyde mildichliken vorlenet.

Dar van gheve ik int erste dem ghemenen gude der stad Hamborch achte schillingh penninghe to weghen unde steghen. Vortmer gheve ik miner moder Gheseken Witten druttich mark penninghe uth minem redesten gude. Unde war id sake, dat myn moder vorbenomet eer my vorstorve, so gheve ik van den druttich marken vorscreven Heynen Witten, mynem broder, teyn mark penninghe unde Alleken Eppen, miner suster teyn mark penninghe. Dar mede scholen se ghentzliken wesen ghescheden unde delet van minen nalatenen guderen.

Unde wes ik vorder hebbe unde nalate van alle minen guderen, id sy an klederen, smyde, beddewande, redem ghelde, korne, husgherade unde inghedome, klene unde grot, wo men dat benomen mach, nichtes uth ghescheden, gheve ik degher unde al Alleken, nu tortid myner eeliken husfrouwen. De schal dat hebben unde beholden sunder jemendes hinder edder insegghent.

Unde ik Alleke vorbenomet, Cord Witten eelike husfrouwe, neme dat uppe des stunde mines dodes, dat ik nynerleye ervegut hebbe entfanghen. Men wes ik hebbe unde nalate van mynem dele gudes, dat hebbe ik mit der hulpe godes van vromen unde erbaren luden vormiddelst mynem zuren, swaren arbeyde vordenet, unde de my des eyn deel mede dorch eren guden willen uth milder hant hebben ghegheven.

Dar van gheve ik deme ghemenen gude der stad Hamborch achte schillingh penninghe to weghen unde steghen. Unde wes ik vorder hebbe mit Corde, mynem eliken manne, in alle unssen guderen, alse de vor sind benomet, klene unde grot, nichtes uth ghescheden, gheve ik degher unde al Corde Witten, mynem eeliken manne. De schal de hebben unde beholden, sunder jenigherleye delinghe dar aff to donde, he sy gheistlick efte werlick. Doch so schal de ersame rad to Hamborch eres rechtes van der stad weghen in alle dessen ghiften, de unsser eyn dem anderen heft ghegeven, unvorsumet wesen.

Unde alle desse ghifte to schickende unde ghevende, de unsser eyn dem anderen hebben ghegeven, unde unsse testamentariese to wesende, hebben wii ghesettet unde koren de erbaren manne Willem Brande unde Ghercken van Hachede, borgher to Hamborch. De scholen desse vorscrevene ghifte schicken unde gheven, alse wy en des wol betruwen unde alse se vor gode willen bekant wesen. Ok scholen se vulle macht hebben, oft erer eyn vorstorve, dat de ander enen erliken man in des doden stede mach kesen, de en dat vorwaren helpe. Ok willen wii, dat desset testament by vuller macht blyve so langhe, went wii dat muntliken wedder ropen.

Hir sind an unde over wesen de ersamen manne heren Henningh Buryngh unde Kersten van der Hoye, radmanne van deme rade sunderghes hir to ghevoghet, sik desses to vordenkende. Unde to merer zekerheit sind desser testamente twe allenes ludes dat ene uth dem anderen sneden over dat wort Jhesus, der dat ene is by dem rade unde dat ander by minen testamentariesen in vorwaringhe.