1481.11.28.

In godes namen amen.

Ick Hinrick Schouwenborgh, borgher to Hamborgh, by wolmacht mynes lyves, vulmechtich myner synne unde witte, god sy ghelovet, hebbe by redelicheit over ghetrachtet unde beweghen, dat ick yo so alle mynschen des naturliken dodes sterven moet, unde doch nicht kan gheweten wo unde wannere. Hir umme so hebbe myn testament unde latesten willen ghesettet, gheschikket unde gheordineret in dusser naghescrevene wise, uppe dat neyn weer, kiff noch unwille dorve upstan unde irrisen van weghene myner nalatene gudere twischen Alken, myner eeliken husvrouwen, unde mynen negesten erven.

Aldus so hebbe ick van erffghude entfangen unde upgheboret eynundeseventich marck lubesche pennynghe teyn schillinghe ache penninge unde nicht mer, so ick dat neme up de stunde mynes dodes. Sodane eyneundeseventich marck teyn schillinge achte penninghe gheve unde tokere ick wedder mynen negesten erven uthe mynen nalatenen redesten guderen to entfangende unde uptoborende na myneme dode. Dar mede schullen se erffliker wiis affghedelet unde affghesunderget wesen van alle mynen nalatenen ghudern, wechliken unde unwechliken, wome de nomen mach unde ick de nalate, wente god allemechtich my de dorch myne sorchvoldige arbeyt hefft toghevoghet unde vorlenet.

Dar van gheve ick vorder to der vorbetteringe weghe unde steghe achte schillinge pennynghe. Wes ick denne furder nalate van ghuderen, wen dusse giffte vornoghet unde uthghegeven synt, de syn wechlick edder unwechlick, hues, hoff, renthe, wor ick de hebbe buten unde bynnen Hamborgh, bedde, lakene, dekene, kussene, sulversmyde, sulvere leppele, corallen, snore, guldene boghen, gropen, kannen, kethelen unde alle husgerad, nichtes utgenomen, so ick dat hebbe unde nalate unde ghebruket hebbe myt Alken, myner eeliken husvrouwen, dat gheve unde tokere ick alle dersulven Alken, myner husvrouwen, rouweliken tobesittende unde tobrukende na ereme willen sunder hinder unde bysprake myner erven unde frunde unde eynes yeweliken, uppe dat se god vor my bidde unde gheve in de ere godes na mynem dode sodane gudere unde kleynode, so ick de er toghevende bevalen hebbe by mynem levende, des ick er ghantz wol truwe.

Duth myn testament unde latesten willen tovorstande, vultobringende unde Alken, myner husvrouwen, vormunder towesende, sette unde kese ick de werdigen, vorsichtigen vromen mannes unde heren hern mester Johann Schouwenborgh, proveste to Utersten, mynen broder, unde heren Everde vam Kroghe, ratmanne, unde Hinrick van Huthem, myne ghuden frunde. Wille furder, dat duth myn testament unde lateste wille by vullermacht blyve so langhe, wente ick dat muntliken wedderrope. Ock schal de erlike rad van der stad wegen hir ane alle eres rechtes unvorsumet wesen.