1481.03.24.

In gades namen amen.

Ick Hans Smid, burger to Hamborch, yn liflike k[rankheit ... ] doch vulmechtich miner zynne unde redelicheit avertrachtende desser vorgencklike [... st]erven moeth, wet averst nicht wo unde wanner. Unde darumme, up dat my de doeth nicht unvorsichtigen vorsnelle, so sette ick tovorne myn testament unde latesten willen yn disser nabescreven wise unde neme dat up de stunde mynes dodes, datt ick neen ervegud upgeboret eder entfangen hebbe. Meen wes ick hebbe, heft my god almechtich mildichliken durch mynes sorchvoldigen arbeides willen vorlenet.

Unde dar van deme gemenen gude to wegen unde to stegen achte schilling penning. Item geve ik myner eeliken husfrouwen Greteken, de dat mede besorget unde bearbeydet heft unde my alse eyn erlick frame vrouwe gutliken gedan unde wol to willen gewesen heft, alle er cleider to ereme live gemaket unde deme smide, voftigen unde bogen. Vortmer gev[e ick er] alle unse sulversmide, dat wy wente hirto tosamende gebruket hebben u[nde ... ing]edome, hußgerade, alse ketelle, kannen, grapen, vate, schappe, kisten, cley[der ...] dekenne, lakenne, kussenne unde hovetkußen, wo men dat benomen [mach ... ]eden und alle ziner tobehoringe, up dat ze god deste truweliker, dewile se leved, [vor my] bidde.

Unde wil, dat desset myn testament unde lateste wille, alse vorberort is, yn macht unde wesende blive, so lange yck datsulven mundliken wedderrope. Unnde dyt myn testament unde lateste wille so tovorfullende unde myner husfrouwen Greteken vorbenomet vormunder towesende, kese yck de beschedennen manne Hermen Smider unde Heynen Zeedorp, zee andechtigen biddende, dyt, alse bovenscreven is, tovorfullende, so ick en des wol tobetruwe. Unnde in alle dissen vorscrevenen giften schall de erlike rad to Hamborg in eren rechten unvorsumet wesen.

[Hir a]n unde aver zint gewesen de ersamen heren Gotke Tode unde her Erick [...] Hamborch van deme rade sunderges darto gefuget. To merer zekerh[eit ...] twee eyns ludes eyn uthe deme anderen gesneden aver dat word amen [...] erliken rade to Hamborch unde dat ander by my unde mynen testamentarien invorwaringe.