1480.07.24.

In godes namen amen.

Ick Hille Mollers, by wolmachte mynes lyves unde by redelicheit myner witte unde synne, hebbe betrachtet unde overghedacht de ghebrekelicheit des mynschen levendes, also dat ick yo so alle mynschen des naturliken dodes sterven moet unde doch nicht kan gheweten wo unde wannere. Hir umme uppe dat my de doet nicht unvorsichtigen overvalle, so sette ick tovoren myn testament unde latesten willen myner nalatenen ghuderen myt vulbort, willen, consente unde tolate Hermen Mollers, mynes sones, mynes neghesten rechten erven, wonafftich to Luneborgh, unde Hanses Lancouwen unde Hinrickes Gotekens, myner rechten vormundere, so dat klarliken ghescreven steyt in deme denkeboke des richtes up duth naghescrevene iar uppe den Mandach na aller apostele daghe van bevele des erbaren heren Hinrickes Murmesters, des borghemesters, in deme anderen blade.

Aldus denne interste boven alle so bevele ick myne zele in de mylden barmeharticheit godes, vorbiddinghe der junckvrouwen Marien unde aller hilligen unde beghere, dat myne naghescrevenen testamentarii mynen lycham na wontliker wise desser erentriken stad to der erden bestedigen laten, wen ick na deme willen godes byn vorstorven, god gheve yo saligen. Denne forder so gheve ick achte schillinge pennynge to der vorbeteringhe weghe unde steghe.

Wes ick denne nalate van ghuderen, wen myn licham to der erden is bestediget, de ghudere alle, de syn wo de syn, wechlik, unwechlik, kledere, gropen, kannen, nichtes utghenomen, de gheve ick alle unde uplate Hermen Mollere vorbenomet, myneme sonen, rouweliken de to entfangende unde to brukende sunder insaghe unde hinder eynes yeweliken.

Duth myn testament unde latesten willen tovorstande, vultobringende unde myner latatenen ghudere sick na myneme dode undertowyndende unde de myneme vorbenomeden sone Hermen overtoantwordende, sette unde kese ick de vromen mannes Hanse Lankouwen unde Hinrick Gotekens, myne vormundere unde ghuden frunde. Wille ock dat duth testament unde myn lateste wille by vullermacht blyve so langhe, wente ick dat muntliken wedderrope. Ock schal de erlike rad desser stad van der stad weghen alle eres rechtes hir ane unvorsumet wesen.