1480.03.01.

In godes namen amen.

Ik Hans Moller, eyn dener des ersamen rades to Hamborch, wol dat ik krenklick bin an deme levende doch redelick unde vulmechtich alle myner synne, hebbe sorchvoldighen overtrachtet de ghebrecklicheit der mynschliken nature, so dat ik alse alle mynschen des naturliken dodes jo sterven moet unde doch nicht kan weten de tid edder stunde des dodes. Hir umme hebbe ik minen lesten willen unde myn testament gheschicket unde maket in desser nascrevenen wise.

Interste alse ik vorsterve, bevele ik mine armen sundighen zele in de barmherticheit des almechtigen gods, vorbiddinghe der juncfrouwen Marien unde aller hilghen unde begere, dat men my erliken to der graft bringhe unde na loveliker wonheit der stad Hamborch beghan late. Unde neme dat uppe de stunde mines dodes, dat ik minen rechten erven meer hebbe ghegheven, wen ik van ervegude hebbe entfanghen. Unde wes ik hebbe, heft my got almechtich vormiddelst mynem suren arbeyde mildichliken vorlenet.

Dar van gheve ik int erste dem ghemenen gude der stad Hamborch achte schillingk penninghe to weghen unde steghen. Vortmer gheve ik to der ere godes den armen luden to dem hilghengheiste vyff unde vertich lubesche mark to erer notroft myt sodanem underschede, dat my de vorstendere darsulves vor sodane ghelt alle jar scholen gheven dre mark penninghe lyfrenthe to twen tiden in dem jar, alse veer unde twintich schillinghe uppe sunte Michaelis dach unde ver unde twintich schillinghe uppe paschen, de wile ik leve unde nemende mer na mynem dode. Item gheve ik minen besten hoyken to sunte Peter to dem buwe. Item gheve ik sunte Martens broderschop, dede holden de molen lude in sunte Peters kerken, dre mark penninghe.

Item gheve ik Symer Moller, mynem broder, alle myn tymmer touwe, klene unde grot, nichtes uth ghescheden. Unde wes ik vorder hebbe unde nalate van alle minen guderen, id sy an ghelde, in schult, in klederen, bedden, polen, lakenen, deken, kannen, grapen, ketellen, kysten, schappen, alle husgherade unde inghedome, nichtes uth ghescheden, dat gheve ik alle Alleken Mollers, myner maghet. De schal dat hebben unde beholden unde des bruken to erer not. Unde wan se stervet, so schal sodane gudere, de er dar van overlopet, Hans Moller, der sulven Alleken sone, vort hebben unde beholden sunder jemendes insegghent. Doch so schal de ersame rad to Hamborch eres rechtes van der stad weghen in alle dessen ghiften unvorsumet wesen.

Unde alle desse ghifte to ghevende unde schickende, hebbe ik ghesettet unde koren de ersamen manne Hinrik Moller, hovemerster tor overen molen, unde Corde van Dalem, borghere to Hamborch. De scholen desse ghifte schicken unde gheven, alse ik en des wol betruwe unde alse se vor gode willen bekant wesen. Ok scholen se vulle macht hebben, oft erer eyn vorstorve, dat de ander enen erliken man in des doden stede mach kesen, de en dat vorwaren helpe. Ok wil ik, dat desset testament by vuller macht blyve so langhe, went ik dat muntliken wedderrope.

Hir sint an unde over wesen de ersamen manne heren Hinrik van Dulmen unde Hermen Bekendorp, radmanne van deme rade sunderghes hir to ghevoghet, sik desses to vordenkende. Unde to merer zekerheit sind desser testamente twe allenes ludes dat ene uth dem anderen sneden over dat wort Jhesus, der dat ene is by dem rade unde dat ander by mynen testamentarien in vorwaringhe.