1470.11.12.

Pantbreff Hoyger Tzerneholtes uppe de vorhoginge twelff hundert marck Lub. der dorppe Wantesbeke Oldenfelde Ralevestede etc.

Wii Cristiernn etc. bekennen unde betugen apenbare vor alszweme vor uns unse erven unde nakomelinge , dat wii rechter witliker schult schuldich sin deme ersamen Hoyger Tzerneholte unseme borger unser stad Hamborch XII marck Lub. alse to Lubeke unde Hamborch nu tor tiid genge unde geve sin , de wii eme denne opgeslagen hebben uppe unse dorpe alse namelick oppe Wantesbeke Oldenvelde Ralevestede Bramvelde Alsterdorppe unde Stegelhope , de he alrede van uns in pande hefft , so dat desse unse breff unde vorhoginge deme ersten unde anderen breve eme gegeven unde de ersten desseme to neneme vorfange wesen scholen, sunder wii unse erven unde nakomelinge willen dessen breff na den ersten unde dar negest dessen breff oppe de ersten summen ludende allens geholden hebben by werde to blivende sunder allen intoch effte argelist. Desser vorhoginge tor tuchnisse etc.

Datum an deme mandage in den achtedagen Martini anno etc. LXX.