1470.10.11.a.

Hetebreff den van Oldeslo super summa VIII unde LX marcarum Lub.

Wii Cristiernn etc. bekennen unde betugen apenbare in desseme unseme breve vor alszweme , dat wii vor uns unse erven unde nakomelinge unsen leven getruwen borgermeisteren radmannen unde gantzen gemeynheyt unses wickbeldes Oldeslo vor sick unde ere nakomelinge mit ener samenden hant hebben heten loven den werdigen unde vorsichtigen heren proveste deken unde gantzeme cappittel to Hamborch unde eren nakomelingen vor VIII unde LX Lub. marck penninge hovetsummen, de se uns tor noge an gudeme graveme pagimente entrechtet unde getellet, unde vort in desser unser lande nutticheyt gekeret unde uthgegeven hebben. Vor welke VIII unde LX marck Lub. hovetsummen de ergemelten deken provest unde gantze cappittel unde ere nakomelinge jarlikes scholen opboren unde entfangen in unde uth unseme tollen unde allen redesten wissesten unde unvorsetteden guderen unde opkomen to Oldeslo belegen LX marck Lub. jarliker rente in den achtedagen Martini unbeworen unde ane allen hinder , also dat furder unser hovetbreff en darop gegeven wol clarliken uthwiset unde inneholdet.

Unde wii Cristiernn etc. koning erben. unde unse nakomelinge beden jegenwordigen in crafft unde macht desses unses breves unseme tolner to Oldeslo , dat he sodane vorscreven LX marck rente den vorscreven cappittel to Hamborch effte eren nakomelingen alle jare in den achtedagen Martini baven unde vor alle andere rente , de men uth deme tollen jarlikes vorrentet , unbeworen sunder jenigerleye hindernisse insage unde vortoch erst betale unde nochafftigen entrichte , bii unsen koningliken ungnaden , so lange wii sodane VIII unde LX marck Lub. hovetsummen mit der rente wedderloset unde betalet hebben. Unde oppe dat de vorscreven unse leven getruwen borgermeistere unde radtmenne unde ere nakomelinge desses lofftes halven in gheynen schaden en komen , so setten wii en jegenwordigen in crafft unde macht desses breves in vorwaringe alle jarlike opkome boven de uthgiffte des tollen des schotes der lanthure der sultehure der dregerhure des tegelhuses hure unde alle unvorsettede opkome jarlikes der to eneme pande unde vorwaringe. dar se eren schaden ane soken mogen, dat god affkere , efft se des lofftes in jenigen schaden qwemen to hebbende . Unde vorbeden hirumme unsen vogeden unde amptluden to Segeberge , dat se sick mit den huren pachten unde tinsen nicht mit alle beweren effte bekummeren, so lange de LX marck Lub. jarliker rente den vorgnanten cappittels heren vul unde al vornoget unde betalet sint. Alle desse vorscreven stucke etc. des to groter tuchnisse etc.

Datum Segeberge in den achtedagen sancti Martini episcopi anno etc. LXX.