1470.09.01.

Dat de Hamborger mogen vorbuwen dredusent marck in der Stenborch boven de dusent de en ime hovetbreve versegelt sin.

Wii Cristiernn etc. koning don witlick bekennen unde betugen apenbar vor alszweme , dat wii vor uns unse erven unde nakomelinge hebben gegunnet unde togelaten , gunnen unde tolaten ock jegenwordigen in crafft desses unses breves den ersamen unde vorsichtigen unsen leven getruwen borgermeisteren unde radtmannen unser stad Hamborch, dat se mogen affnemen unde nedderbreken dat olde buwete van unseme slote Stenborch, dat se van uns witliken in pande hebben, na inholde des hovetbreves unde buwen sodane erbenante slot edder pandt wedder na ereme behegeliken willen mit sulkeme bescheyde, darinne to vorbuwende dredusent marck boven de dusent marck de wii en alrede ime hovetbreve vororlavet unde vorsegelt hebben, welke vorscreven III^m marck wii unse erven effte nakomelinge den erbenanten unsen leven getruwen effte eren nakomelingen borgermeisteren unde radtmannen dar sulvest mit deme hovetsummen, wanner wii dat obgnante unse slodt mit synen tobehoringen wedder losende werden deger unde all na lude des erbenante hovetbreves en dar opp gegeven scholen unde willen wedder geven unde to dancke betalen. Des to merer tuchnisse hebben wii unse koninglike secret etc.

Datum an unser stad Sleszwigk ame dage sancti Egidii des hilligen abbatis na Christi gebordt anno etc. LXX.

___________________________________________