1470.09.01.a.

Pantbreff her Erikes frouwen van Tzeven borgermeisters to Hamborch oppe de aelvoertollen dar sulvest vor LXXV marck Lub. penninge.

Wii Cristiernn etc. bekennen unde betugen apenbar in desseme breve, dat wii mit berademe mode vor uns unse erven unde nakomelinge vor LXXV Lub. marck peninge in Rhinschen gulden, de wii tor guder noge entfangen unde in unse brucklike nutticheyt gekeret hebben , vorkofft unde opgelaten hebben, vorkopen unde oplaten in crafft desses unses breves deme ersamen vorsichtigen heren Erike van Tzeven borgermeistere to Hamborch siner erliken husfrouwen unde eren erven effte deme hebbere desses breves mit ereme guden willen de aelvore in deme tollen to Hamborch uns anrorende, so de van heren to heren greven to Holsten uns sint angheervet unde wii der na gebruket hebben unde noch brukende sint wente oppe desse tiid, welke rente genomet de aelvore de ergnante here Erick van Tzeven sin elike husfrouwe effte de jenne de dessen breff hefft mit ereme willen alle jare oppe de tiid, also men den tollen apent to Hamborch rente daruth to betalende van unserwegen , scholen unde mogen entfangen unde opboren umbekummert unde ungehindert van eneme jewelken. Unde wii scholen unde willen unde unse erven unde nakomelinge eme de rente alse de aelvore rechte warende wesen unde en de entfrien by unsen kosten unde arbeyde vor alle den jennen de vor recht komen willen , so vaken en des is to donde unde wii dar to geesschet werden by boden effte besegelden breven.

Wii geven ock vullenkomen macht deme vorgnanten heren Erike unde sinen erven offt dar jemant sodane vorscreven tollene mit vorsate entbrachte effte dachte to entbringende, dat se sodant mogen weren unde hinderen unde dat vort nach rechte vorfurderen. Wii hebben ock unse erven unde nakomelingen in desseme unseme breve beholden den willen, dat wii alle jare in den twelff nachten to wynnachten den wedderkop desser vorben. renthe aelvore genomet en mogen unde scholen witliken vorkundigen sunder list mit unsen breven bynnen, den XII nachten negest na der vorkundinge erstkomende scholen unde willen wii effte unse erven heren Erike siner erliken husfrouwen offte eren erven erben. edder hebber desses breves de ergnante rente unbekummert laten volgen unde den hovetsummen also LXXV marck Lub. penninge in eneme summen unde to ener tiid bynnen Hamborch in Rhinschen gulden to dancke unde to willen betalen. Dit lave wii Cristiernn koning vorgenant vor uns unse erven unde nakomelinge den vorgenanten heren Erike unde sinen erven unde hebbere desses breves in guden truwen stede unde vast sunder alle list to holdende, unde hebben des to groter tuchnisse etc. -

Datum an unseme slote Segeberge ame daghe Egidii anno etc. LXX.

___________________________________________