1465.11.11.

Pantbreff der Hamburger oppe de Stenborch vor teyn dusent marck.

Wii Cristiernn etc. bekennen unde betugen apenbar in desseme unseme breve vor alszweme, dat wii van den ersamen unsen leven getruwen borgermesteren unde radtmennen unser stad Hamborch teyndusent Lub. marck in golde unde gudeme grovem gelde bynnen Hamborch genge unde geve to willen unde gantzer noge opgebort entfangen unde de vort to unser lande sunderges des hertogdomes to Sleszwigk unde greveschop tho Holsten unde Stormern nut unde beste gantzliken gekert hebben. Darvor hebbe wii mit wolbedachteme mode na rade willen unde vulbord unser leven getruwen radgeven den vorgen. borgermeisteren radtmannen borgeren unde menheyt der erben. stad Hamborch jegenwardich unde tokomende vorpandet unde vorsettet, vorpanden unde vorsetten en jegenwordich in crafft desses breves unse slot unde vogedie tor Stenborch an unseme lande to Holsten Bremisches stichtes belegen , mit dessen nabescreven kerspelen dorperen alle sinen tobehoringen jarliken tynsen pachten unde opkomen , beschedeliken de Krempe dar jarlikes uthkomen veertich marck Lub., Elszekope dar utkomen negenundenegentich marck, Kremptorpe negenundenegentich marck achte schillinge, Zuderouwe hundert veffteyn marck twe schillinge , Brunsholte unde Kamerlande sostich marck verteyn schillinge, Grevenkope twehundert seventeyn marck XIIII B negen penninge , Borsflete unde Inflete negenundedruttich marck VIII ẞ, Negenbroke drehundert unde XXXI marck teyn schillinge unde X penninge, van Espede negen marck viff schillinge negen A, Elsterstorpe sevenundevertich marck achte schillinge , van den kerspelen over der Store viffundesostich marck, de Wilster Mersch hundert achteyn marck , darsulves in deme Nygenwolde twe punt viff schillinge achte, to der Krempe van wordgelde II marck II 3 [van Bertoldes Kampe XX marck] van haveren to Brocktorpe unde tome Flete vefftich marck , van Detleves Luden vame Damme XXXII marck, van deme tegeden to Bekemunde soesz marck, van deme tegeden tor Beke veertich marck, van deme tegeden tor Nortorpe viff, marck unde van deme stedegelde XXIIII 3 [ item noch ime Nigenvelde XX marck niges schattes hir bii gesettet dorch Hinrick Rantzouwen anno domini LXXXV] mit allen andern tynsen huren pachten schatten twen molen dar to behorende beden tolne acker gebuwet unde ungebuwet wisschen weyden landen bediket unde unbediket watern watersfloten stromen visscherien havern honren holten weck unde hardt masten jacht allen rechten unde gerichten hogest middelst unde sidest broken an hals unde an handt unde gemenliken mit allen rechticheiden herlicheyden frigheyden brukingen unde upkomen unde aller slachter nutt, unde vortmer mit aller tobęhoringe benomet unde unbenomet so wii unde unse vorfaren de qwitest unde friest beseten hebben, nichtes mit alle uth gescheden , ane gestlike leenware frigemandenst unde wes dat mene landt deyt, unde ock elvendusent Lubesche marck de wii unde unse vorfarn dar ane vorpandet unde vorsegelt hebben, tokomende dessen nabeschreven personen, alse den domheren to Lubeke dredusent Lub. marck, item den vicarien to sunte Peter bynnen Lubeke drutteyndehalvehundert Lub. marck. item der ebbedisschen to Itzeho dusent Lub. marck, item etliken vicarien to Hamborch drehundert Lub. marck, item den calandesheren to Munsterdorpe veerhundert Lub. marck, item der Houweschildesschen to Itzeho vefftich Lub. marck; item mester Nicolao Hugen twedusent Lub. marck , item Luder Rumor dredusent Lub. marck , de de van Hamborch vorrenten scholen na lude der hovetbreve dar op gegeven ; unde de sulven van Hamborch scholen vullemacht hebben de erben . elvendusent Lub . marck altosamende edder en deel na lude der breve dar op besegelt uth to losende wan en dat beqweme is.

De vorscreven van Hamborch scholen ock vullemacht hebben in deme erben. slote mit siner tobehoringe wo des to donde is to vorbuwende uppe dusent Lub. marck, ifft en dat so van noden duncket to wesende edder gelevet; unde wan de vorbuwet sin , so geven wii en vort macht unde gunnen unde vulborden mit desseme breve dat buwete in wesende to holdende , dat se hir ane dar eyn baven alle jar vorbuwen mogen vefftich Lub. marck; sunder wan se op sodane ergnante summen dar ane vorbuwet hebben, duchte en denne dar furder wes ane behoeff sin to vorbuwende , dat scholen se don mit unseme unser erven unde nakomelinge edder weme wii dat in unseme affwesende bevalende werden vulborde unde willen , unde uns van alleme erben. buwende redelike rekenschop don ; welke erben. summen so uthgelecht wii en willen unde scholen mit deme vorscreven hovetsummen wedder betalen sunder insprake unde geverde to ener tiid unde stede nabenomet. Wii unse erven unde nakomelinge scholen unde willen ock desse guder vorbidden beschermen unde vordedingen dewile se de van Hamborch in pandeschen weren hebben gelick unsen andern gudern , de wii in brukinge unde besittinge holden , unde were , des nicht scheen mothe, dat de Stenborch den van Hamborch affgesleken edder wunnen wurde van jemande dar tegens wii edder unse nakomelinge der van Hamborch to rechte mechtich weren, so scholen unde willen wii unse erven unde unse nakomelinge mit unser macht dat wedder wynnen helpen bynnen eneme halven jare negestvolgende uppe unse egene koste schaden unde eventure, edder en de teyndusent Lub. marck sunder insage bynnen der sulven tiid wedder entrichten.

Ock schal nemant jenigerleye korne ute der Stor tor seward schepen unde voren , ane id sche mit willen unde vulbort des amptmans uppe der Stenborch, uthgenomen ifft jemant rittermatesch man in deme lande to Holsten wonnafftich egene korn hadde, dat he sulven gebuwet edder ock van tegeden entfangen hadde, sodane korne mach heute der Store schepen. Unde wer, des nicht scheen mote, dat de insetenen der vorscreven lande unde kerspele sick wreveliken jegen de van Hamborch dewile se in eren weren sin setteden, ere tynse pachte schatte bede tolne rechticheyde unde broke nicht betaleden edder anders se in den vorscreven articulen jenigewiisz vorhinderenden unde in redeliken geboden unhorsam wurden, so scholen unde willen wii unse erven unde nakomelinge dat ernstliken straffen unde se to horsame bringen helpen uppe unse egene koste unde eventure; wii unse erven unde nakomelinge scholen unde willen en ock de gudere van aller anderer ansprake entfrigen unde en der rechte warende wesen , wan wo vaken unde wor en des noet unde behoff is. Ock scholen de erben. van Hamborch de vorg. summen penninge, dewile dat erben. unse slot Stenborch mit der tobehoringe ere pant is, an uns unse erven unde nakomelinge nicht vorbreken konen. Beholden doch uns unsen erven unde nakomelingen , dat wii dat slot Stenborch mit sinen tobehoringen vorg . wedder losen mogen, unde wan wii dat don willen, scholen unde willen wii den van Hamborch eyn gantz jar tovorn witliken bynnen Hamborch vorkundingen vormiddelst unseme besegelden breve in den achtedagen sunte Mertens des werden bisschoppes, unde alse dat jar umme komen is, en denne teyndusent marck Lub. unde wes se van den elvendusent marken de dar tovorn inne weren uth geloset unde dar to wes se in deme slote vorbuwet hebben weddergeven handtreken unde betalen, unde in deme hovetstole nicht affkorten bynnen Hamborch in gudeme graven gelde alse dar denne genge unde geve is to ener tiid in eneme summen to ener gantzen noge unde willen.

Unde wanner wii koning Cristiernn erben. den vorscreven van Hamborch dat obgenante slot in ere were nu overantwordet hebben, so beholden wii uns doch dat de rente hure unde upkomen wente to sunte Nicolai dach unde lichtmissen negestkomende uns volgen scholen van deme sulven slote, unde ock dat wii alle nastande, schulde van tynsen unde allen affgerichteden vorwisseden broken uns oppe dessen sunte Mertens dagh vorvallen na landtrechte mogen irmanen unde furdern laten; unde waner wii dat veleben. slot wedderlosen unde innemen willen , so scholen wii unse erven unde nakomelinge de erben. van Hamborch tovoren er se dat sulve slot ut eren weren van sick antworden wedderumme denne besorgen unde nochafftigen vorsekeren, dat en ere rente hure unde alle opkomen uppe sunte Nicolai dagh unde lichtmissen darnegestvolgende bedaget unde anvallende gantzerdinge vor midvasten dar denne negest vort volgende wol gegulden unde vornoget werden, unde der geliken umme alle nastande schulde van tynsen unde affgerechteden vorwisseden broken en mit rechte to bemanende gunstigen furderlick unde behulpen wesen.

Alle articule vorscreven samptliken unde besunderen laven wii koning Cristiernn erben. vor uns unse erven unde nakomelinge den borgermeisteren radtmannen borgeren inwoneren unde gantzen meenheyt der stadt Hamborch jegenwordich unde tokomende stede vast unde unvorbraken to holdende in groteme geloven unde guden truwen sunder alle geverde, scholen unde willen en ock in allen dessen handelingen alle dingk to deme besten keren unde duden; unde hebben des to groter tuchnisse unse koninglike secret witliken laten hengen to dessem breve. Unde wii Arnt van godes unde des stoles to Rome gnaden bisschopp to Lubeke, Gotzick van Alevelde, Clawes Keye unde Hans Rantzouwe brodere hern Schackens sons , Benedictus van Alevelde hern Hinrickes sone, Detleff van Bockwolde hern Detlef sone , Clawes Ratlow, Luder Rumor unde Wulff Pogwisch Hans sone knapen, went wii alse radtgeven unses gnedigesten leven heren erben. alle articule vorg. van des erben. slotes wegen begrepen mederaden belevet unde vulbordet hebben, so hebben wii to tuchnisse unde furder witlicheyt unse ingesegel endrachtigen unde witliken mede henget heten nedden an dessen breff, /

Geven op unseme slote Segeberge na godes bort XIIII dar na ame LXV jare ame dage sunte Mertens des werden bisschoppes.

___________________________________________