1465.10.18.

Pantbreff Hoygers Tzerneholtes unde Clawes deme Swaren borger to Hamborch ludende op VI dorpe de se hebben in pandinge vor twelffhundert Rinsche gulden.

Wii Cristiern etc. bekennen unde betugen apenbar vor alszweme in desseme unseme breve , dat wii unse erven unde nakomelinge rechter witliker schuldt schuldich synt den ersamen unsen leven besunderen borgeren to Hamborch Hoyger Tzerneholte unde Clawesze deme Swaren unde eren erven twelffhundert Rinsche gulden, de wii to guder noge van en upgebort unde entfangen hebben. Vor dessen vorben. summen geldes vorpanden unde vorsetten wii den vorben. Hoyger unde Clawesze unde eren erven desse nagescreven unse soesz dorppe by Hamborch belegen, de van dodes wegen seligen heren Johans tome Berge radtmans to Hamborch an uns vorfallen sindt, alse Wantesbeke, Radelefstede, Oldenvelde, Bramvelde, Steylschope unde Alsterdorppe mit alle eren tobehoringen droge unde nath ackeren wisschen weyden holten diken dammen visscherien wateren watersvloten unde jacht mit alleme rechte unde gerichte hogest middelst unde sidest in hals unde in handt unde mit der molen unde slichtes mit aller tobehoringe renten unde opkomen nichtes uthgenomen ane geistlike leenware unde vrigmannedenst unde wes dat mene landt deyt, also dat de erben. zelige her Johan tome Berge allervriest in weren hadde , de to hebben unde to gebruken ; desse vorscreven dorppe unde guder scholen wii unse erven unde nakomelingen den erben.

Hoyger unde Clawese unde eren erven dewile id ere pandt is rechte warende wesen vor alle de dar op spreken willen se sin gestlick effte wertlick unde en de helpen vorbidden unde beschermen like unsen anderen guderen. Ock scholen wii unse erven unde nakomelinge desse vorben. dorpe unde gudere mit alle erer tobehoringe deme erben. Hoyger Tzerneholte unde Clawes deme Swaren unde eren erven bynnen viff jaren na datum desses breves nicht afflosen, unde wanner de viff jar umme komen sint, unde wii unse erven unde nakomelinge Hoyger unde Clawesz vorben. unde eren erven sodane vorben. XII Rinsche gulden in golde edder gudeme graveme sulver gelde to Lubeke unde Hamborch tor tiid genge unde geve bynnen Hamborch to gantzer noge geven unde betalen, sunder jenigerleye inseggent hulperede edder argelist, de uns unsen erven unde nakomelingen mochten vramen unde den erben. Hoyger unde Clawesze unde eren erven mochten schaden . Des tor orkunde unde witlicheyt hebben wii unse koninglike secret laten hengen vor dessen unsen breff, unde wii nagescreven Be[nedictus] van A[lefelde ] heren Hinrickessone unde Otte Split redere unses aldergnedigesten hern koninges erben. hebben unse ingesegel tor witlicheyt mede hir vor witliken laten hengen. -

Gegeven na godes gebort veerteynhundert ime viff unde sostigesten jare ame dage Luce des hilgen ewangelisten.

___________________________________________