1455.10.07.

Vnssen vruntliken grud vnde was wij gudes vermoghen.

Ersamen leuen hern, guden vrunde.

De hochgheboren here Frederik to Brunswigk vnde Luneborch hertoghe heft juw vnde vns vp vnssen breff, siner herlicheit gesant, andwerde screuen, welk wij juw besloten hirane senden, darinne he juw vnde vns to daghe essehet vp den donrsdach in sunte Gallen daghe schirtkomende, so gij in dem breue vornemende werden. Oft gij, leuen heren vnde frunde, sodanes daghes vp de tid willen vnde konen ghewarden, setten wij to juw sulues, so willen wij de vnsse dar gherne schicken; duchte juwen leuen ok, dat gij van anderer daghe weghen, darto gij vnde wij vmmetrent sunte Gallen dach vns vorsecht hebben, des vp de tid nicht ghewarden konden, so mochte gij deme obgenanten fursten sodanes van vnsser beider weghene mit deme vochlikesten vorlegghen. Wolden gij sinen gnaden denne den Donrsdach vor Aller hilghen daghe(1) to vromiddaghe darto vortakenen, de duchte vns wol ghedelik wesen. Wes juw hiran radsam duncket, setten wij to juwer wisheid. Willet, leuen hern, deme vilgenanten fursten hiraf andwerde van unsser beider weghen scriuen, vns darna richten moghen, oursenden. Willen wij gherne vorschulden. Sijt Gade beuolen.

Screuen vnder vnsser stad secrete, des Dinxstdaghes vor Dionisii, anno etc. L quinto.