1455.08.04.

Vnssen vruntliken grud vnde wes wij gudes vormoghen.

Ersamen leuen hern, guden vrunde.

Wij doen juw vruntliken weten, wo de gheduchtighe Aluerik van Bodendike, amptman to Winsen, den Ersamen hern Hinrik Lezemane to Ripenborch wesende des Sonnauendes na Jacobi(1) to sik vorbodet vnde eme, wo des slotes Winsen vndirsaten sinem gnedighen hern vnde eme clegheliken hadden anghebracht, wo he ze ouerelle, voruestede vnde van dem eren dreue, vorgheuen hadde, beghernde, dat he de voruestinghe afdoen vnde des slotes Winsen vndirsaten bij eren rechticheiden laten wolde.

Darvp here Hinrik hadde andwerdet, dat he des slotes Winsen vndirsaten nicht hadde ouerfallen, ok en edder jemende nicht gherne ouerfal doen wolde; men etlike des vorbenomeden slotes vndirsaten hadden bij eghenen willen visschet vp deme vorde to Warwischk, de in des slotes Ripenborch ghebede is beleghen, de hadde he laten darvmme to rechte esschen, vnde alse ze nicht quemen, wern ze mit rechte voruestet. Vnder velen handelinghen begherede Aluerik noch, dat men de voruestinghe afdede, vp dat daraf anders nyn vnwille entstunde.

Des hadde her Hinrik gheandwerdet, so danes queme juw vnde vns vnde nicht eme to; dat he darvmme an vns screue. Darvp Aluerik hadde geandwerdet, sin here edder he dachten darvmme vurder nicht to scrieuende; men he zede id eme vmme des besten vnde guder naburschop nwillen, alse he dar amptman werde, dat he id vord an de stede brachte, dat men davmme daghe helde vnde so dan vleghe, vmme vnwillen to vordat men darvmme daghe helde vnde so dan vleghe, vmme vnwillen to vormidende, de daraf entstan mochte.

Ok so vns duncket, is id nicht allenen vmme des vordes to Warwischk willen; men des slotes Winsen vndirsaten dancken sik ok anderer vnde meer vischerie vnde rechticheid an der Elue to vndirwindende, wan ze alsus langhe dan hebben. Jnt ende heft Aluerik begheret, dat he des andwerde von hern Hinricke moghe weten, wer de stede hirvmme teghens sinen hern vnde ene komen willen. Des, leuen hern, duchte vns radzam, oft de hochgheborne here Frederik, to Luneborch etc. hertogne, edder Aluerik siner gnaden amptman, juw vnde vns davmme to daghe esschede, dat men sodane nicht vorlede; daraf willet vns juwen willen wedder scriuen.

Ok, leuen hern, de obgenante her Hinrik Lezeman vnde de tolnere to Eyslinghe schelaftich sind vmme des gherichtes willen etliker koten; wente de tolnere secht, dat to deme Tollenspikere schole behoren dat richte hogheste vnde sideste ouer enen kroch beleghen bij der kerken in deme Kerkwerder, vnde der koten beleghen vp deme Crouwelle, der de ene Tideken Kalere, de andere Clawes Willekens vnde de drudde heynen Lutken tobehort; ouer here Hinrik secht, de lude vp den steden wonaftich gheuen deme amptmanne to Ripenborch schat vnde schulde, vnde de amptlude darsulues hebben ok dar dat gherichte hat.

Beghern wij vruntliken, gij willen darvmme vorkuntschoppen, wo men id darmede van oldinghes heft gheholden, vp dat men ze darouer entweigsetten vnde vorscheden moghe, vnde vns, wes gij to warde komen konen, wedder scriuen; dat willen wij alletid vruntliken gherne voschulden. Siid Gade beuoulen.

Screuen vnder vnsser stad secrete des Mandaghes na Petri ad vincula, anno etc. LV.