1452.04.14.

Wytlik sy alle den gennen de desse scrift seen, horen edder lesen,

dat wy, Henneke Ludeken wonaftich vp dem Ghowerke, vnde Hermen Stal borgher to Hamborch mit wolbedachten mode synt endrachtliken ens gheworden, also dat ik, Henneke Ludeken, hebbe koft to erfkope van Hermen Stal synen vort gheheten de Vthseuene, een halff schip waters, vor hundert mark Lubesch, de ik by my beholde, my vnde mynen eruen to ghude. Vor welkere hundert mark Lubesch ik, henneke Ludeken, will vnde schal edder myne eruen efte de besittere des vordes vnde halff schip waters schullen deme vorbenomeden Hermen Stal efte synen eruen alle iar wol to willen gheuen vnde betalen vyf mark Lubesch to renthe bynnen Hamborch in den achtedaghen to Paschen, in vnde vth de vorscreuen vorde, gheheten de Vthsceuene, vnde halff schip waters, sunder vormynnerir gehe, hynder vnde vurder vortogheringe.

Weret dat ik, Henneke Ludeken, edder myne eruen, efte de besitter desses vorscreuen vordes desse vyf mark renthe alle iar twisschen beyden Paschen, dem enen na deme anderen volghende, nicht to willen betaleden, so vorwillekore ik, Henneke Ludeken, my vor myne eruen vnde dem besittere desses vordes in desseme suluen breue, dat de vorbenomede Hermen Stal edder syne eruen dessen erscreuen vort, gheheten de Vthseuene, vnde halff schip waters moghen vnde schullen wedder to syk nehmen, antasten, bruken vnde beuisschen to ewighen ktyden sunder myne, myner eruen vnde des besitters des vorscreuen vordes efte iemendes weddersprake vnde insaghe.

Vnde ik, Hermen Stal erbenomet, bekenne vnde betughe apenbare in deseme suluen breue, dat de kop vnde vorkopings desses erscreuen vordes, gheheten de Vthseuene, vnde halff schip waters twisschen my vnde Henneken Ludeken gheschen vnde handelt is in aller wyse vnde vorworden alse erscreuen is. Alle desse vorscreuen stucke samentliken vnde een iewelik besunderen loue wy, Henneke Ludeken vnde Hermen Stal erbenomet, vnser een deme anderen vor vns vnde vor dem besittere des erscreuen vordes stede, vast vnde vnuorbroken to holdende in ghuden truwen, sunder alle arghelist, hulperede vnde behelpinge ghestlikes vnse eruen, vnde ik, Henne Ludeken, loue ok vor ghestlikes vnde werlikes rechtes. To vurder bewisinge vnde warheit so synt desser breue twe ghescreuen vnde de ene vth deme anderen sneden, wort by worden all ens ludende. Den enen breff hebbe ik, Senneke Ludeken, in myner hude; den anderen breff hebbe ik, Hermen Stal, in myner hude.

An welke beyde breue hebbe wy, Henneke Ludeken vnde Hermen Stal, vnse inghezeghele mit Hans Molen vnde glawes Stals inghezeghele, de wy to tuchnisse desses kopes vnde aller vorscreuen stucke darwmme beden hebben, witliken vnde mit wolberaden mode henget laten an dessen breff. Ey, Hans Mole vnde Clawes Stal erbenomet, bekennet vnde betughet openbare an desseme suluen breue, dat vns synt witlik alle vorscreuen stucke. Des hebbe wy to tuchnisse vnde warheit vnde inghezeghele mit Henneken Ludeke vnde Hermen Stals inghezoghele vmme beyder partye vruntliker bede willen witliken henget laten an dessen breff.