1450.03.29.a.

Domino Frederico, duci Brunswicensi etc.

Jrluchtige furste, hochgeborne gunstige leue here.

So juwe herlicheit an vns heft ghescreuen, wo dersuluen to kennende geuen hebbe her Alberd van der Molen, radman to Luneborg, nu tor tid houedman to Winsen, wo wij ome verhinderinghe vnde infal daen hebben vnde vurder gedencken to donde an deme storvange up der Elue vnde andern visscherien behorich dem slote to Winsen, begherende, wij willen iuwe hrlicheid vnde den innehebber des slotes to Winsen darane ninen hinder efte infal don noch don laten, so dat de in des slotes rechticheiden, rouwelken beistten moge, darvan wij ok an de Ersamen vnsse frunde van Lubeborch scholen screuen hebben etc., mit mer worden an deme breue utghedrucket, hebben wij wol vernomen.

Des, hogeborne gunstige leue here, bidden wij jwue herlicheid darup vrundliken weten, dat wij derseluen edder deme innehebbere des slotes Winsen in des slotes rechticheiden ninen hinder edder infal ghedan hebben, alse iuw angherichtet is, vnde woldent ok vngerne doen edder doen laten, dar wij dat wusten. Begheren dentliken, juwe herlicheid wille mit deme houedmanne darsulues id so voruoghen vnde bestellen, dat vns in deme vnssen des ok nicht wedderfare. Alse denne juwe vilgenante herlicheid sunderges van dem storvanghe vnde der visscherie roret: des, gunstige leue here, einsodane drepet nicht an vns allene, men de ersame vnsse leuen vrunde, den rad der stad Lubeke, mede; darvmme willen wij na dassen anstanden Paßchen mit densuluen, so wij erst bij se komende werden, spreken vnde juwer herlicheid denne antwerd bij eghener bodesschop beualen etc.

Datum dominica Palmarum.